અમેરિકા-ઇઝરાયલ અને ઇરાન યુદ્ધનો આજે સાતમો દિવસ છે. ઇરાને અત્યાર સુધી અમેરિકા અને ઇઝરાયલ સહિત 12 દેશો પર હુમલો કર્યો છે. આ દેશોમાં UAE, કતાર, બહેરીન, જોર્ડન, ઇરાક, કુવૈત, ઓમાન, સાઉદી અરેબિયા, સાયપ્રસ, સીરિયા અને અઝરબૈજાનનો સમાવેશ થાય છે.

અમેરિકી સેનાએ જણાવ્યું કે યુદ્ધમાં અત્યાર સુધીમાં ઈરાનના 30થી વધુ જહાજો ડૂબાડી દેવામાં આવ્યા છે. આમાં એક એવું જહાજ પણ સામેલ છે જેનો ઉપયોગ ડ્રોન લોન્ચ કરવા માટે થતો હતો.

અમેરિકાના સંરક્ષણ પ્રધાન પીટ હેગસેથે પણ કહ્યું છે કે તેમની સેના ઈરાન સામેની લડાઈને વધુ તેજ કરવા જઈ રહી છે. અમેરિકા પાસે હથિયારો અને દારૂગોળાની કોઈ કમી નથી. જોકે, રાષ્ટ્રપતિ ટ્રમ્પે કહ્યું છે કે અમેરિકા ઈરાન સામે જમીની હુમલા નહીં કરે, કારણ કે તે સમયનો બગાડ હશે.

ઈરાને ઇઝરાયલ પર ઘણી બેલિસ્ટિક મિસાઈલો છોડી છે. આ મિસાઈલોમાં ક્લસ્ટર બોમ્બ લાગેલા હતા

ઇઝરાયલી સેના મુજબ, જ્યારે આવી મિસાઈલ જમીન તરફ આવે છે ત્યારે તેનું વોરહેડ હવામાં જ ખુલી જાય છે અને લગભગ 20 નાના બોમ્બ અલગ-અલગ જગ્યાએ પડી જાય છે. દરેક બોમ્બમાં લગભગ 2.5 કિલો વિસ્ફોટક હોય છે અને તે લગભગ 8 કિલોમીટરના વિસ્તારમાં ફેલાઈ શકે છે.

આ નાના બોમ્બ સીધા જમીન પર પડે છે અને અથડાતા જ ફાટી જાય છે. સેનાનું કહેવું છે કે તેનાથી એક મોટા વિસ્તારને ખતરો થઈ શકે છે, જોકે દરેક નાના બોમ્બનો ધડાકો સામાન્ય બેલિસ્ટિક મિસાઈલ જેટલો શક્તિશાળી હોતો નથી.

જોકે તે સ્પષ્ટ નથી કે ઈરાને કુલ કેટલી આવી મિસાઈલો છોડી છે, કારણ કે ઘણી મિસાઈલોને ઈઝરાયલની એર ડિફેન્સ સિસ્ટમે રસ્તામાં જ તોડી પાડી.

ત્યાં જ, ઇરાને ગુરુવારે બહેરીનની સરકારી તેલ રિફાઇનરી BAPCO પર મિસાઇલથી હુમલો કર્યો. જેના કારણે રિફાઇનરીના એક યુનિટમાં આગ લાગી ગઈ. જોકે, બાદમાં આગ પર કાબૂ મેળવી લેવાયો હતો. બહેરીનના રાષ્ટ્રીય સંચાર કેન્દ્ર અનુસાર, BAPCO એનર્જીસની આ રિફાઇનરી દેશના પૂર્વીય કિનારે આવેલા સિત્રા દ્વીપમાં છે. તે રાજધાની મનામાની દક્ષિણમાં આવેલું છે.

ઈરાન યુદ્ધથી અત્યાર સુધીમાં ₹4.35 લાખ કરોડનું નુકસાન

ઈરાન યુદ્ધમાં અત્યાર સુધીમાં લગભગ 4.35 લાખ કરોડ રૂપિયાના નુકસાનનો અંદાજ છે. યુદ્ધ શરૂ થયાના પહેલા 24 કલાકમાં જ ભારે સૈન્ય ખર્ચ થયો અને દરરોજ અબજો રૂપિયા ખર્ચ થઈ રહ્યા છે.

તે જ સમયે, તેહરાનમાં સતત બોમ્બમારાને કારણે 12 હજાર દર્શકોની ક્ષમતા ધરાવતું આઝાદી સ્ટેડિયમ નાશ પામ્યું. અમીરકબીર શહેરમાં મિસાઈલ હુમલામાં બે વિદ્યાર્થીઓના મોત થયા અને 12 લોકો ઘાયલ થયા. અન્ય ઘણા શહેરોમાં પણ ભારે નુકસાન થવાની આશંકા વ્યક્ત કરવામાં આવી છે.

Image Gallery