રાજ્યના પાટનગરમાં વાઈબ્રન્ટ મહોત્સવ તથા અન્ય મોટા કાર્યક્રમો દરમિયાન જાહેર સ્થળોને રંગબેરંગી ફૂલોથી સજાવવામાં આવતા હોય છે. શહેરના મુખ્ય માર્ગો પૂરતી મર્યાદિત રહેતી ફૂલોની સજાવટ દેશ-વિદેશના મહાનુભવોના મન મોહી લેવામાં સફળ રહી છે. ત્યારે નાગરિકોને વ્યાપક સ્તરે ફૂલોની રંગીન દુનિયામાં મ્હાલવાની તક મળે તે હેતુથી ગાંધીનગર મ્યુનિસિપલ કોર્પોરેશન દ્વારા ફ્લાવર શોનું આયોજન કરવામાં આવ્યું છે. આગામી ડિસેમ્બર મહિનાના છેલ્લા અઠવાડિયામાં સરિતા ઉદ્યાન ખાતે આ ફ્લાવર શોનો પ્રારંભ કરવાની કવાયત ચાલી રહી છે. ગાંધીનગરવાસીઓ રંગબેરંગી ફૂલો સાથે નવા વર્ષની ઉજવણી કરી શકે તે હેતુથી જાન્યુઆરી મહિનાના પ્રથમ સપ્તાહ સુધી આ ફ્લાવર શો ચાલુ રાખવામાં આવશે.

અમદાવાદ મ્યુનિસિપલ કોર્પોરેશન દ્વારા વર્ષોથી ફલાવર શોનું ભવ્ય આયોજન થતું આવ્યું છે. વાઈબ્રન્ટ અમદાવાદ ફ્લાવર શૉમાં એકંદરે દેશ-વિદેશના 15 લાખથી વધુ ફૂલ-છોડના રોપા મૂકવામાં આવ્યા હતા, જેમાં પિટુનિયા, ગજેનિયા, બિગોનિયા, તોરણીયા, મેરીગોલ્ડ, લિલિયમ, ઓર્ચિડ, ડહેલિયા, એમરન્સ લીલી, કેક્ટસ પ્લાન્ટ, જરબેરા જેવા અનેક દેશી-વિદેશી ફૂલોનો સમાવેશ કરાયો હતો.

ગયા વર્ષે તૈયારીઓ કરાયા બાદ ફ્લાવર શોનું આયોજન થઈ શક્યું ન હતું ગાંધીનગરમાં પણ અમદાવાદ જેવા ભવ્ય ફ્લાવર શોનું પ્રથમ વખત આયોજન કરવા તંત્ર દ્વારા ફરી કવાયત હાથ ધરાઈ છે. અગાઉ ગત વર્ષે સેકટર-1ના તળાવ વિસ્તારમાં ફ્લાવર શો યોજવાની કવાયત હાથ ધરવામાં આવી હતી. જેના માટે બે કરોડના અંદાજિત ખર્ચ સાથે ફ્લાવર શો માટે ટેન્ડર પ્રક્રિયા હાથ ધરવામાં આવવી હતી.જો કે બાગાયત સમિતિ ને વિશ્વાસમાં લીધા વિના જાહેરાત કરી દેવાઈ હતી.અને મ્યુનિસિપલ કમિશનર પણ ટ્રેનિંગમાં ગયા હોવાથી આખુ આયોજન પડી ભાગ્યું હતું.

હવે 2025માં ડિસેમ્બર મહિનાના છેલ્લા અઠવાડિયાથી એટલે કે ક્રિસમથી માંડી જાન્યુઆરી મહિનાના પ્રથમ સપ્તાહ સુધી સરિતા ઉદ્યાન ખાતે ફ્લાવર શોનું આયોજન કરાયું છે. જેના માટે 18 ઓક્ટોબરના રોજ ટેન્ડર પ્રક્રિયા પણ હાથી ધરાઈ હતી. અમદાવાદની જેમ ગાંધીનગરમાં ફૂલોના અવનવા સ્ટ્રક્ચર પણ ઊભા કરવાનું આયોજન છે. ગુજરાતની આગવી ઓળખ અને દેશની ઉપલબ્ધિને દર્શાવતા સ્ટ્રક્ચર આ શો દરમિયાન ઊભા કરવામાં આવશે.

ગત વર્ષે ફ્લાવર શો માટે રૂ. બે કરોડના અંદાજિત ખર્ચ સાથે આયોજન હાથ ધરવામાં આવ્યુ હતું. હવે આ વર્ષે ફરી ફ્લાવર શો યોજવા કવાયત ચાલી રહી છે સૂત્રો પાસેથી મળતી માહિતી મુજબ, આ વર્ષે ફ્લાવર શોનો અંદાજિત ખર્ચ રૂ.4-5 કરોડ થઈ શકે છે. આ કામગીરી માટે કેટલા ડિઝાઇન સહિતના ચોક્કસ ખર્ચનું એસ્ટિમેટ એજન્સી ધ્વારા આપવામાં આવશે.