ગુજરાત બાદ ફરીદાબાદમાં આતંકીઓનું ‘ઝેરી’ ષડયંત્ર:ડોક્ટરનાં રૂમમાંથી 300kg RDX, AK-47, દારૂગોળો, કેમિકલ જપ્ત
ગઈકાલે ગાંધીનગરમાંથી ATSએ 3 આતંકીઓ ઝડપી પાડ્યા હતા. તેમની પાસેથી 3 પિસ્તોલ, 30 કારતૂસ અને કેમિકલનો જથ્થો મળી આવ્યો હતો. જ્યારે આજે જમ્મુ-કાશ્મીર પોલીસે હરિયાણાના ફરીદાબાદમાં એક ડોક્ટરના ઘરે દરોડા પાડ્યા દરમિયાન આશરે 300 કિલો RDX, એક AK-47 અને દારૂગોળો અને કેમિકલનો જથ્થો જપ્ત કર્યો છે. જેથી શક્યતા છે કે આતંકીઓ કોઈ મોટા આતંકી હુમલાનું પ્લાનિંગ કરી રહ્યા હોય. જેથી ગુજરાત સહિત 4 રાજ્યોમાં તપાસ શરૂ કરી દેવામાં આવી છે.
આ ડોક્ટરનું નામ આદિલ અહેમદ છે. જમ્મુ અને કાશ્મીર પોલીસે 7 નવેમ્બરના રોજ ઉત્તર પ્રદેશના સહારનપુરમાં તેની ધરપકડ કરી હતી. આદિલની પૂછપરછ ચાલી રહી છે અને તેણે ફરીદાબાદમાં વિસ્ફોટકો લગાવ્યા હોવાની કબૂલાત કરી છે. આદિલ અગાઉ અનંતનાગની જનરલ હોસ્પિટલમાં પ્રેક્ટિસ કરતો હતો. તેણે 2024 માં ત્યાંથી રાજીનામું આપ્યું. ત્યારબાદ તેણે સહારનપુરમાં પ્રેક્ટિસ શરૂ કરી.
જમ્મુ અને કાશ્મીર પોલીસે ઉત્તર પ્રદેશના સહારનપુરના અનંતનાગથી એક ડોક્ટરની આતંકવાદી સંગઠન જૈશ-એ-મોહમ્મદ સાથેના કથિત સંબંધોના આરોપસર ધરપકડ કરી હતી. આ સંદર્ભમાં, જમ્મુ અને કાશ્મીર પોલીસે ફરીદાબાદમાં ડોક્ટરના ભાડાના રૂમમાં દરોડો પાડ્યો હતો.
એવું કહેવાય છે કે મુજાહિલ શકીલ નામના કાશ્મીરી ડૉક્ટરે ફરીદાબાદમાં એક રૂમ ભાડે લીધો હતો. આરોપી ડૉક્ટર ત્યાં રહેતો ન હતો. તેણે ફક્ત પોતાનો સામાન રાખવા માટે રૂમ ભાડે લીધો હતો. પોલીસે રૂમમાંથી 14 બેગ જપ્ત કરી હતી, જેમાં 300 કિલો આરડીએક્સ, એક એકે-47 રાઇફલ, 84 કારતૂસ અને કેમિકલ હતા.
આદિલે 3 મહિના પહેલા રૂમ ભાડે લીધો હતો
એવું કહેવાય છે કે ડૉ. શકીલે ત્રણ મહિના પહેલા જ રૂમ ભાડે લીધો હતો. દરોડા દરમિયાન 10 થી 12 વાહનો ઘટનાસ્થળે પહોંચ્યા હતા. પોલીસે આરોપી ડૉક્ટરની અટકાયત કરી છે. ચાર રાજ્યો: જમ્મુ અને કાશ્મીર, ઉત્તર પ્રદેશ, હરિયાણા અને ગુજરાત સાથેના જોડાણની તપાસ કરવામાં આવી રહી છે.
મકાનમાલિકને કહ્યું હતું- માત્ર સામાન જ રાખવો છે
સૂત્રોના જણાવ્યા અનુસાર, રૂમ ભાડે લેતી વખતે, ડૉ. શકીલે મકાનમાલિકને કહ્યું હતું કે તે ફક્ત પોતાનો સામાન ત્યાં રાખવા માંગે છે. ત્યારબાદ ઘણી બેગ ત્યાં મૂકવામાં આવી હતી. મકાનમાલિક કે બીજા કોઈએ પૂછ્યું ન હતું કે બેગમાં શું છે. અહેવાલ મુજબ, રૂમમાં 14-15 બેગ મળી આવી હતી.
