સાયબર સુરક્ષા સંશોધકોએ એક નવો ખતરો શોધી કાઢ્યો છે, જેમાં હેકર્સ ગૂગલના ફાસ્ટ પેર ફીચરનો દુરુપયોગ કરી તમારા વાયરલેસ ઈયરબડ્સના માઈક્રોફોન પર કબજો કરી શકે છે. સોની, વનપ્લસ અને જેબીએલ જેવા મોટા બ્રાન્ડ્સ પર પણ જોખમ!

જેમ-જેમ ટેકનોલોજી આપણું જીવન સરળ બનાવી રહી છે, તેમ-તેમ તે નવી સુરક્ષા પડકારો પણ લાવી રહી છે. અત્યાર સુધી આપણે માત્ર ફોન હેક થવાથી ડરતા હતા, પરંતુ હવે તમારા કાનમાં લાગેલા વાયરલેસ ઈયરબડ્સ પણ સુરક્ષિત નથી. સાયબર સુરક્ષા નિષ્ણાતોએ ‘WhisperPair’ નામના એક એવા હુમલાની ચેતવણી આપી છે જે તમારી પ્રાઇવસીને જોખમમાં મૂકી શકે છે.

માત્ર 15 સેકન્ડમાં ખેલ ખતમ!

બેલ્જિયમની કેયુ લ્યુવેન યુનિવર્સિટીના સંશોધકોએ આ ખતરાની પુષ્ટિ કરી છે. નિષ્ણાતોના મતે, તમે રસ્તા પર ચાલતા હોવ કે મેટ્રોમાં સંગીત સાંભળતા હોવ, હેકર આશરે 50 ફૂટની દૂરીથી તમારા ડિવાઇસમાં ઘૂસણખોરી કરી શકે છે. સૌથી ચોંકાવનારી વાત એ છે કે આ આખી પ્રક્રિયામાં 15 સેકન્ડથી પણ ઓછો સમય લાગે છે.