ગાંધીનગરના ગિયોડ ગામમાં છેલ્લા કેટલાક મહિનાઓથી પંચાયત અને સ્થાનિક તંત્ર દ્વારા ગામના વિકાસ માટે વિવિધ શેરીઓમાં રોડ અને બ્લોક નાખવાની કામગીરી પૂરજોશમાં ચાલી રહી છે. આ કામગીરીથી ગામનો દેખાવ સુધર્યો છે અને ગામ 'શહેર' જેવું દેખાવું શરૂ થયું છે, પરંતુ વિકાસની હરણફાળ ગ્રામજનો માટે મોટી આફત લઈને આવી છે. રોડ અને બ્લોકનું કામ પૂરું થયા બાદ કે ચાલુ કામગીરી દરમિયાન પણ પાણીના નિકાલની યોગ્ય વ્યવસ્થા (ડ્રેનેજ સિસ્ટમ) ન થવાને કારણે આજે સમગ્ર ગામ જળબંબાકારની સ્થિતિમાં મુકાયું છે.

પાણી નિકાલની વ્યવસ્થા ન થતા લોકો પરેશાન

ગાંધીનગરના ગિયોડમાં વિકાસની હરણફાળ ગ્રામજનો માટે મોટી આફત લઈને આવી છે. ગામની અનેક શેરીઓ અને રસ્તાઓ પર વરસાદી પાણી તેમજ ઘરગથ્થુ વપરાયેલું પાણી ભરાઈ રહે છે. જેના કારણે ગ્રામજનોને રોજિંદી અવરજવરમાં પારાવાર મુશ્કેલીઓનો સામનો કરવો પડી રહ્યો છે. સ્થાનિક રહેવાસીઓએ આક્રોશ વ્યક્ત કરતા જણાવ્યું હતું કે, રોડનું લેવલ ઊંચું આવી ગયું છે અને પાણીના નિકાલ માટે કોઈ નાળા કે ડ્રેનેજ લાઈનનું પ્લાનિંગ કરવામાં આવ્યું નથી. પરિણામે, ઘરમાંથી નીકળતું પાણી પણ શેરીઓમાં ભરાઈ રહે છે અને અનેક ઘરોના દરવાજા સુધી પાણી ચડી આવવાના દૈનિક દૃશ્યો સર્જાયા છે.

લોકો ગંદા પાણી વચ્ચેથી પસાર થવા મજબૂર

શેરીઓમાં કાયમ પાણી ભરાઈ રહેવાના કારણે નાના બાળકો અને વૃદ્ધો માટે આ ભરાયેલા ગંદા પાણીમાંથી પસાર થવું અત્યંત જોખમભર્યું બની ગયું છે. વળી, ભરાયેલા આ ગંદા પાણીના કારણે મચ્છરોનો ઉપદ્રવ વધ્યો છે, જે ડેન્ગ્યુ, મેલેરિયા જેવા રોગચાળાને નોતરી શકે છે. આ સ્થિતિ ગામની સ્વચ્છતા અને ગ્રામજનોના આરોગ્ય માટે સીધો ખતરો ઊભો કરી રહી છે.

ગ્રામજનોએ વધુમાં જણાવ્યું કે, વિકાસના નામે શરૂ થયેલું આ કામ હવે મુશ્કેલીનું કારણ બની ગયું છે. સ્થાનિકોએ પંચાયત અને સંબંધિત ઈજનેરિંગ વિભાગ સમક્ષ તાત્કાલિક ધોરણે યોગ્ય ડ્રેનેજ લાઈન અને નિકાલ વ્યવસ્થા ગોઠવવાની માંગ કરી છે. ગ્રામજનોની પ્રાથમિકતા છે કે રોડનું કામ જ્યાં થયું છે, ત્યાં સૌથી પહેલા પાણીના નિકાલની કાયમી વ્યવસ્થા કરવામાં આવે, જેથી તેઓ આ દયનીય સ્થિતિમાંથી મુક્તિ મેળવી શકે. જો તંત્ર દ્વારા આ પ્રશ્નનો ઝડપી ઉકેલ નહીં લાવવામાં આવે તો ગ્રામજનો દ્વારા ઉગ્ર આંદોલન કરવામાં આવી શકે છે.