ગાંધીનગરના સેક્ટર-21 સ્થિત સદસ્ય નિવાસમાં આવેલા ધારાસભ્યના એક ક્વાર્ટરમાંથી યુવક અને યુવતી શંકાસ્પદ સ્થિતિમાં ઝડપાતાં ચકચાર મચી છે. આ ક્વાર્ટર વાંસદાના ધારાસભ્ય અનંત પટેલનું હોવાનું જાણવા મળ્યું છે. ઘટનાની જાણ થતાં પોલીસે બંનેને સ્ટેશન લાવી પૂછપરછ કરી હતી, પરંતુ કોઈ શંકાસ્પદ ગતિવિધિ ન જણાતાં નિવેદન લઈને તેમને જવા દેવાયા હતા.

મધરાત્રે ધારાસભ્યના કવાર્ટરે પહોંચી પોલીસ

પ્રાપ્ત વિગતો અનુસાર, 29 ઓક્ટોબર મધરાતે ગાંધીનગર સેક્ટર-21 ખાતે આવેલા ધારાસભ્ય ક્વાર્ટરમાં એક કપલ રોકાયેલું હોવાની માહિતી સેક્ટર-21 પોલીસને મળી હતી. પોલીસ તાત્કાલિક ધારાસભ્ય અનંત પટેલના ફાળવેલા ક્વાર્ટર પર પહોંચી હતી. તપાસ દરમિયાન ત્યાં એક યુવક અને એક યુવતી હાજર મળ્યા હતા. મામલાની ગંભીરતાને ધ્યાનમાં રાખીને સેક્ટર-21 પોલીસ મથકના સેકન્ડ પીઆઈ આર. જે. સિસોદિયાએ તેમને પોલીસ સ્ટેશન લાવીને પૂછપરછ કરી હતી.

પૂછપરછમાં કોઈ શંકાશીલ પ્રવૃત્તિ જોવા મળી નથી

આ અંગે પીઆઈ સિસોદિયાએ જણાવ્યું કે, બંને યુવક-યુવતી એકબીજાના પરિચિત છે અને ઘણા સમયથી ઓળખે છે. જેઓ ગાંધીનગરના જ રહેવાસી છે. યુવતી કોલેજમાં અભ્યાસ કરે છે, જ્યારે યુવક ખાનગી નોકરી કરે છે. આ કપલ ધારાસભ્ય અનંત પટેલના પર્સનલ આસિસ્ટન્ટ (PA)ના પરિચિત હોવાનું સામે આવ્યું છે. પૂછપરછમાં એવી કોઈ શંકાશીલ ગતિવિધિ જાણવા મળી નથી. બંનેના નિવેદન લઈને જવા દેવામાં આવ્યા છે.

ધારાસભ્યોને મળતી સરકારી સુવિધાઓના દુરુપયોગ પર ઉઠ્યા સવાલ

ઉલ્લેખનીય છે કે,ધારાસભ્ય ક્વાર્ટરનો આ પ્રકારે ઉપયોગ થતાં સદસ્ય નિવાસમાં ફફડાટ ફેલાયો છે અને ધારાસભ્યોને મળતી સરકારી સુવિધાઓના દુરુપયોગ પર ગંભીર સવાલો ઊભા થયા છે.

સરકારી ક્વાર્ટરનો ઉપયોગ PA કે પછી પરિચિતો કરતા હોય છે

સામાન્ય રીતે ધારાસભ્યો પોતાના મતવિસ્તારમાં રહેતા હોય છે, ત્યારે તેમના ફાળવેલા સરકારી ક્વાર્ટરનો ઉપયોગ તેમના PA કે પછી તેમના પરિચિતો દ્વારા વૈભવી સુખ-સુવિધાઓ ભોગવવા માટે થતો હોવાના આક્ષેપો થઈ રહ્યા છે.

તાજેતરમાં જ સેક્ટર-17 ખાતે નવીન લક્ઝુરિયસ મકાનોનું લોકાર્પણ કરાયું છે

તાજેતરમાં જ સેક્ટર-17 ખાતે ધારાસભ્યોના નવીન લક્ઝુરિયસ મકાનોનું લોકાર્પણ કરાયું છે. ત્યારે ક્વાર્ટરના દુરુપયોગને રોકવા માટે વિધાનસભા કક્ષાએથી કડક નિયમો અને દેખરેખ જરૂરી હોવાની માંગણી ઊઠી છે. ધારાસભ્ય પણ એક રાજ્ય સેવક હોવાથી સરકારી મકાનનો દુરુપયોગ કરવા બદલ તેમની સામે પણ યોગ્ય કાર્યવાહી થવી જોઈએ તેવી લોકચર્ચા છે.

ગાંધીનગરના સેક્ટર-17માં જૂનાં MLA ક્વાર્ટર્સને તોડીને 220 કરોડ રૂપિયાથી વધુના ખર્ચે ધારાસભ્યો માટે 216 આધુનિક અને લક્ઝરિયસ 5BHK(ઓફિસ અને સર્વન્ટ રૂમ સહિત) ફ્લેટ તૈયાર થઈ ચૂક્યા છે. ભાઈબીજના શુભ દિવસે એટલે કે 23 ઓક્ટોબરે કેન્દ્રીય ગૃહમંત્રી અને સાંસદ અમિત શાહના હસ્તે આ નવીન આવાસોનું લોકાર્પણ થયું હતું. આ આવાસો આધુનિક સુવિધાઓથી સજ્જ છે, જે ગાંધીનગરના વહીવટી અને સાંસ્કૃતિક મહત્ત્વને વધુ ઉજાગર કરશે. ધારાસભ્ય બન્યા બાદ તમામ સભ્યોને ગાંધીનગર ખાતે MLA ક્વાટર્સ ખાતે એક આવાસ ફાળવવામાં આવશે. આ આવાસમાં ધારાસભ્યને એક ડ્રોઈંગ રૂમ, બે બેડરૂમ, ડાઈનિંગ રૂમ અને રસોડા સહિતના ફ્લેટની સગવડ આપવામાં આવે છે.