આ વર્ષે દેશભરમાં કડકડતી ઠંડી મોડી આવી શકે છે. ભારતીય હવામાન વિભાગ (IMD) ના ડિરેક્ટર જનરલ મૃત્યુંજય મહાપાત્રાએ શુક્રવારે દિલ્હીમાં એક ઓનલાઈન કોન્ફરન્સમાં જણાવ્યું હતું કે નવેમ્બરમાં દેશના મોટાભાગના ભાગોમાં દિવસનું તાપમાન સામાન્યથી નીચે રહી શકે છે, જ્યારે રાત્રિઓ સામાન્ય કરતાં વધુ ગરમ લાગશે.

હવામાનશાસ્ત્રીઓ કહે છે કે લા નીના અસરમાં વિલંબ આનું મુખ્ય કારણ છે. જોકે, પશ્ચિમ હિમાલય પ્રદેશ, હિમાલયની તળેટીઓ, ઉત્તરપૂર્વ ભારતના ઘણા ભાગો અને દક્ષિણ દ્વીપકલ્પના કેટલાક વિસ્તારોમાં દિવસનું તાપમાન સામાન્યથી ઉપર રહી શકે છે. રાત્રિનું લઘુત્તમ તાપમાન પણ સામાન્યથી ઉપર રહેવાની શક્યતા છે.

હવામાન વિભાગે જણાવ્યું હતું કે મધ્ય અને પૂર્વીય વિષુવવૃત્તીય પ્રશાંત મહાસાગર પર લા નીનાની નબળી સ્થિતિ યથાવત છે. આ સ્થિતિ ડિસેમ્બર 2025થી ફેબ્રુઆરી 2026 સુધી ચાલુ રહી શકે છે. લા નીના અસર હેઠળ, સમુદ્રનું પાણી સામાન્ય કરતાં ઠંડુ હોય છે.

નવેમ્બરમાં પણ વરસાદની શક્યતા

હવામાન વિભાગના જણાવ્યા અનુસાર, નવેમ્બરમાં દેશના મોટાભાગના ભાગોમાં સામાન્યથી વધુ અથવા સામાન્ય વરસાદ પડી શકે છે. જોકે, ઉત્તરપશ્ચિમ ભારત અને દક્ષિણ દ્વીપકલ્પના કેટલાક ભાગોમાં સામાન્યથી ઓછો વરસાદ પડવાની શક્યતા છે.

મહાપાત્રાએ જણાવ્યું હતું કે દેશમાં ઓક્ટોબરમાં સરેરાશ 112.1 મીમી વરસાદ પડ્યો હતો, જે સામાન્ય કરતા 49% વધુ છે. 2001પછી ઓક્ટોબરમાં આ બીજો સૌથી વધુ વરસાદ છે. અગાઉ, IMD એ કહ્યું હતું કે મોટાભાગના પ્રદેશોમાં ઓક્ટોબર-ડિસેમ્બર સમયગાળા દરમિયાન સામાન્ય કરતા વધુ વરસાદ પડવાની ધારણા છે.