હવામાન વિભાગ દ્વારા આગામી 24 કલાક હજી વરસાદની આગાહી કરવામાં આવી છે. હવામાન વિભાગના વૈજ્ઞાનિક પ્રદીપ શર્માના જણાવ્યા અનુસાર, આગામી 24 કલાક રાજ્યમાં ભારે વરસાદનું જોર રહેશે. આગામી ત્રણ દિવસ રાજ્યમાં છૂટાછવાયા હળવાથી મધ્યમ વરસાદની આગાહી કરવામાં આવી છે. પાંચમા દિવસથી, એટલે કે 5 નવેમ્બરથી વરસાદની શક્યતા નહિવત્ જોવા મળશે.

આજે અમદાવાદ, બોટાદ, ભાવનગર, અમરેલી, જૂનાગઢ, ગીર સોમનાથ, દીવ, પોરબંદર, આણંદ, ભરૂચ અને સુરતમાં યલો એલર્ટ સાથે ભારે વરસાદની આગાહી કરવામાં આવી છે. અત્યારે અરબ સાગરમાં બનેલું ડિપ્રેશન નબળું પડી ગયું છે, પણ આગામી 24 કલાક સુધી એની અસર જોવા મળશે. આવતીકાલ સુધીમાં વોલમાર્ક ડિપ્રેશનની અસર નહિવત્ થશે, જેથી આગામી થોડા દિવસોમાં વરસાદની શક્યતા નહિવત્ છે. બંદર ઉપર LC3 સિગ્નલ યથાવત્ રાખવામાં આવ્યું છે. આજે અમદાવાદનું મહત્તમ તાપમાન 27 ડિગ્રી રહેવાની શક્યતા છે.

આજે (1 નવેમ્બર) બપોરના 12 વાગ્યા સુધીમાં 86 તાલુકામાં કમોસમી વરસાદ નોંધાયો છે. અમદાવાદ શહેરના હાટકેશ્વર, ભાઈપુર, દૂધેશ્વર રોડ, દિલ્હી દરવાજા સહિતના વિસ્તારોમાં ઝરમર-ઝરમર વરસાદ વરસી રહ્યો છે. બે કલાકમાં ધંધૂકામાં દોઢ ઈંચથી વધુ વરસાદ નોંધાયો છે. મોડીરાતે રાજકોટ, ભાવનગર, અમરેલી સહિતના જિલ્લાઓમાં ખાબકેલા વરસાદથી ખેતરોમાં પાણી ભરેયેલા જોવા મળ્યું છે. તો બીજી તરફ નદીઓ પણ ચોમાસાની માફક વહેતી થઈ છે, જ્યાં છેલ્લા 24 કલાકમાં (ગઈકાલ સવારના 6થી આજે સવારના 6 વાગ્યા સુધી) 141 તાલુકામાં કમોસમી વરસાદ ખાબક્યો છે. એમાં સૌથી વધુ અમરેલીના રાજુલામાં 3.46 ઈંચ તો સૌથી ઓછો અરવલ્લીના બાયડમાં 1 મિમી વરસાદ નોંધાયો છે.