ધર્મનગરી સુરતમાં ચાતુર્માસ પૂર્ણ થતાં જ ફરી એકવાર ત્યાગ અને વૈરાગ્યનો માહોલ સર્જાયો છે. વિક્રમ સંવતના નૂતન વર્ષના પ્રારંભે જ સુરતની ધર્મધરા દીક્ષાના રંગે રંગાવા તૈયાર છે. આગામી 5થી 7 નવેમ્બર દરમિયાન પાલ વિસ્તારમાં 'રોમે રોમે પરમ સ્પર્શ' નામની સુંદર વાટિકામાં 13 સંયમવીરોની સામૂહિક દીક્ષાનો ત્રિ-દિવસીય ભવ્ય મહોત્સવ યોજાશે.

એક જ પરિવારના ત્રણ સભ્યો એકસાથે દીક્ષા લેશે

આ ભવ્ય દીક્ષા મહોત્સવ પરમ-જિન-ભદ્ર-શાંતિ શ્વે. મૂ. પૂ. જૈન સંઘ તથા આચાર્ય ૐકારસૂરિ આરાધના ભવનના ઉપક્રમે યોજાઈ રહ્યો છે. આ પ્રસંગે ભક્તિયોગાચાર્ય આચાર્ય ભગવંત યશોવિજયસૂરી મહારાજા સહિત શાસ્ત્રસંશોધક આચાર્ય ભગવંત મુનિચંદ્રસૂરી મહારાજા અને વૈરાગ્યવારિધિ આચાર્ય ભગવંત કુલચંદ્રસૂરી મહારાજા આદિ 500થી વધુ જૈન સંતોની પાવન નિશ્રા પ્રાપ્ત થશે. સંયમ લેનારા 13 સંયમવીરોમાંથી 11 દીક્ષાર્થીઓ સુરત શહેરના જ છે, જે સુરતની ધર્મ પ્રત્યેની ઊંડી આસ્થાનું પ્રતીક છે. આ દીક્ષા લેનારાઓમાં એક જ પરિવારના ત્રણ સભ્યો મનોજભાઈ, ઇન્દુબેન અને વૃષ્ટિક કોરડિયાનો પણ સમાવેશ થાય છે.

આ દીક્ષા મહોત્સવ માત્ર ધાર્મિક પ્રસંગ જ નહીં, પરંતુ સુરત શહેર માટે સંયમ અને ત્યાગના મૂલ્યોનું પર્વ છે. આ 13 મુમુક્ષુમાં વિવિધ વયજૂથના લોકોનો સમાવેશ થાય છે, જેમાં યુવાનો અને એક જ પરિવારના સભ્યો પણ સામેલ છે. તેમના આત્મકલ્યાણના નિર્ણયથી ધર્મપ્રેમી જનતામાં અનેરો ઉત્સાહ જોવા મળી રહ્યો છે. આ ભવ્ય દીક્ષા સમારોહ સુરતની જૈન ધર્મ પ્રત્યેની અતૂટ શ્રદ્ધા અને સમર્પણને ફરી એકવાર દેશભરમાં ઉજાગર કરશે.

દીક્ષા માટે ત્રિદિવસીય કાર્યક્રમ

ત્રિ-દિવસીય કાર્યક્રમની શરૂઆત બુધવારે 5મી નવેમ્બરે થશે. જેમાં સવારે 9:00 કલાકે શાંતિધારા અભિષેક અને બપોરે છાબ ભરવાની મંગળ વિધિ તથા મહેંદી રસમ યોજાશે. રાત્રે 8:00 કલાકે 'ત્યાગનું સન્માન' બહુમાન સમારોહ અને દીક્ષાર્થી બહેનોના વક્તવ્યનો કાર્યક્રમ યોજાશે. બીજા દિવસે એટલે કે ગુરુવારે સવારે 8:30 કલાકે દીક્ષાર્થીઓની ભવ્ય વર્ષીદાન યાત્રા નીકળશે, જેમાં મુમુક્ષુઓ દાનની સરવાણી વહાવશે. ત્યારબાદ સાંજના સમયે તેમના સંસારી પાત્રમાં અંતિમ ભોજન થશે અને રાત્રે 'પ્રભુમિલનની પ્યાસ' નામથી ભવ્ય વિદાય સમારોહ યોજાશે, જ્યાં દીક્ષાર્થી ભાઈઓ પોતાના અનુભવો અને સંકલ્પો રજૂ કરશે.

વિધિ પૂર્ણ થતાં જ મુમુક્ષુઓની નવી આધ્યાત્મિક યાત્રાનો પ્રારંભ થશે

અંતિમ અને સૌથી મહત્ત્વનો દિવસ શુક્રવારે 7મી નવેમ્બર રહેશે, જે દીક્ષા વિધિનો દિવસ છે. વહેલી સવારે 5:04 કલાકે દીક્ષાર્થીઓનો મંડપ પ્રવેશ થશે. ત્યારબાદ સવારે 8:30 કલાકે મુખ્ય વિધિ થશે, જેમાં ભક્તિયોગાચાર્ય આચાર્ય ભગવંત યશોવિજયસૂરિ મહારાજાના પાવન હસ્તે 13 સંયમવીરોને રજોહરણ પ્રદાન કરવામાં આવશે. રજોહરણ પ્રદાન એ સંયમ માર્ગમાં પ્રવેશનો સૌથી મહત્ત્વપૂર્ણ તબક્કો છે. આ વિધિ પૂર્ણ થતાં જ આ તમામ મુમુક્ષુઓ જૈન દીક્ષિત સાધુ-સાધ્વીજીના પદને પામશે અને તેમની નવી આધ્યાત્મિક યાત્રાનો પ્રારંભ થશે.