બુધવારે કેન્ટુકીના લુઇસવિલેમાં અમદાવાદમાં થયેલા પ્લેન ક્રેશ જેવું જ એક કાર્ગો વિમાન ક્રેશ થયું. આ અકસ્માતમાં 7 લોકોનાં મોત થયાં છે, જ્યારે ઓછામાં ઓછા 11 લોકો ઘાયલ થયા છે.

ફેડરલ એવિએશન ઓથોરિટી (FAA) અનુસાર, UPS ફ્લાઇટ 2976એ મુહમ્મદ અલી ઇન્ટરનેશનલ એરપોર્ટથી હવાઈના હોનોલુલુમાં ડેનિયલ ઇનોયે ઇન્ટરનેશનલ એરપોર્ટ માટે ઉડાન ભરી હતી.

FAAએ અહેવાલ આપ્યો છે કે આ અકસ્માત સાંજે 5:15 વાગ્યે (સ્થાનિક સમય) થયો હતો. એરપોર્ટની દક્ષિણમાં ગાઢ ધુમાડો અને જ્વાળાઓ જોવા મળી હતી. સોશિયલ મીડિયા પર ફરતા વીડિયોમાં તીવ્ર જ્વાળાઓ અને કાટમાળ જોવા મળ્યો હતો.

પોલીસે એરપોર્ટની 8 કિમી ત્રિજ્યામાં રહેતા લોકોને ઘરની અંદર રહેવાનો આદેશ આપ્યો છે. એરપોર્ટને અસ્થાયી રૂપે બંધ કરવામાં આવ્યું છે.

અકસ્માત સ્થળે હજુ પણ આગ યથાવત્

લુઇસવિલે પોલીસ (LMPD)એ જણાવ્યું હતું કે ઘટનાસ્થળે હજુ પણ આગ અને કાટમાળ છે. પ્રારંભિક તપાસ સૂચવે છે કે આગ 2010ની યુપીએસ ફ્લાઇટ 6ના અકસ્માતની જેમ જ વિમાનમાં લિથિયમ બેટરીને કારણે લાગી હોઈ શકે છે.

યુપીએસે જણાવ્યું હતું કે વિમાનમાં ત્રણ ક્રૂ-સભ્ય હતા. હજુ સુધી કોઈ ઈજા કે જાનહાનિની ​​પુષ્ટિ થઈ નથી.

દાવો: વિમાનમાં 95,000 લિટર ઇંધણ હતું

મીડિયા અહેવાલોમાં દાવો કરવામાં આવ્યો છે કે વિમાનમાં આશરે 25,000 ગેલન (95,000 લિટર) જેટ ઇંધણ હતું, જેના કારણે આગ ઝડપથી ફેલાઈ ગઈ. મેકડોનેલ ડગ્લાસ MD-11 મોડલનું વિમાન UPS વર્લ્ડપોર્ટ સુવિધા નજીક ક્રેશ થતાં એક વિશાળ અગ્નિના ગોળામાં ફેરવાઈ ગયું હતું.

આ મોડલ સૌપ્રથમ 1990માં પેસેન્જર એરક્રાફ્ટ તરીકે લોન્ચ કરવામાં આવ્યું હતું, પરંતુ પાછળથી વધતા ઇંધણ ખર્ચને કારણે એને કાર્ગો એરક્રાફ્ટમાં રૂપાંતરિત કરવામાં આવ્યું.

આ વિમાન લગભગ 2.8 લાખ કિલો વજન લઈને ઊડી શકે છે અને એમાં 38,000 ગેલન (લગભગ 1.44 લાખ લિટર) જેટલું બળતણ ભરી શકાય છે.

એરપોર્ટ પર 12000થી વધુ કર્મચારીઓ કામ કરે છે

આ એરપોર્ટ યુપીએસનું મુખ્ય કેન્દ્ર છે, જ્યાં 12000થી વધુ કર્મચારીઓ દરરોજ 20 લાખ પાર્સલનું સંચાલન કરે છે. આ કેન્દ્ર 5 મિલિયન ચોરસ ફૂટમાં ફેલાયેલું છે. પોલીસ અને ફાયરબ્રિગેડની ટીમો તાત્કાલિક ઘટનાસ્થળે પહોંચી ગઈ હતી અને આગ ઓલવવાનું કામ શરૂ કરી દીધું હતું.

યુપીએસ એરલાઇન્સે જણાવ્યું હતું કે કેન્ટુકી પ્લેન વિશે નવી માહિતી ઉપલબ્ધ થતાં અપડેટ્સ શેર કરવામાં આવશે. FAA અને નેશનલ ટ્રાન્સપોર્ટેશન સેફ્ટી બોર્ડ (NTSB) સંયુક્ત રીતે કંપનીના સૌથી મોટા હબ, UPS વર્લ્ડપોર્ટ તરીકે ઓળખાતા એરપોર્ટ પર અકસ્માતની તપાસ કરી રહ્યા છે.