અમદાવાદના ન્યૂ મણિનગર વિસ્તારમાં ડૂન રિવેરા સ્કૂલ પાસે આવેલા શરણમ એલિગન્સમાં પાલતું કૂતરા જર્મન શેફર્ડે બે બાળક પર હુમલો કર્યો હતો. મહિલા કૂતરાને લઈને બ્લોકના પાર્કિંગમાંથી જતી હતી ત્યારે બાળક કૂતરાને જોઈને ભાગ્યાં હતાં. બાળકોને ભાગતાં જોઈને કૂતરાએ તેની પાછળ દોટ મૂકી હતી. એક બાળક નીચે પડી જતાં કૂતરાએ એના દાંત બેસાડી દીધા હતા. ઈજાગ્રસ્ત બંને બાળકને સારવાર અર્થે હોસ્પિટલમાં ખસેડવામાં આવ્યાં હતાં. આ સમગ્ર ઘટના સીસીટીવી કેમેરામાં પણ કેદ થઈ ગઈ હતી. નોંધનીય છે કે હાથીજણ વિસ્તારમાં 6 મહિના પહેલાં ચાર મહિનાની બાળકી પર રોટવીલર નામના પાલતું કૂતરાએ હુમલો કરતાં બાળકીનું મૃત્યુ થયું હતું.

શરણમ એલિગન્સમાં E 202માં રહેતા કૂતરાના માલિકના ઘરે જ્યારે દિવ્ય ભાસ્કર પહોંચ્યું ત્યારે તેમણે આ બાબતે કોઈ વાતચીત કરવાની ના પાડી હતી. ઘરમાં હાજર એક વ્યક્તિ દ્વારા જણાવવામાં આવ્યું હતું કે તમામ લોકો પોલીસ સ્ટેશન ગયા છે. હાજર વ્યક્તિએ કહ્યું હતું કે આ એક દુર્ઘટના હતી, કોઈપણ વ્યક્તિએ જાતે કરીને કર્યું નથી, જોકે આ મામલે તેમણે કોઈપણ વાતચીત કરવાની ના પાડી હતી.

બાળક ગભરાઈને દોડતાં બચકું ભરી લીધું

મળતી માહિતી મુજબ, શહેરના ન્યૂ મણિનગર વિસ્તારમાં કર્ણાવતી રિવેરા ફ્લેટની પાસે આવેલા શરણમ એલિગન્સ નામના ફ્લેટમાં 45 વર્ષે વ્યક્તિ રહે છે અને પોતે ડ્રાઇવિંગનો વ્યવસાય કરે છે. તેમનો છ વર્ષનો પુત્ર છે. 5 નવેમ્બરના રોજ બપોરે 1 વાગ્યાની આસપાસ જ્યારે તેમનો પુત્ર ફ્લેટની નીચે પાર્કિંગમાં રમતો હતો ત્યારે ફ્લેટમાં રહેતાં પાપાબેન ઉર્ફે સંગીતાબેન વનિયર તેમનો પાલતું કૂતરો જર્મન શેફર્ડને લઈને નીચે ફરતાં હતાં. દરમિયાન છ વર્ષીય બાળક જ્યારે પાર્કિંગમાંથી પસાર થતું તો ત્યારે જર્મન શેફર્ડ કૂતરાએ અચાનક જ તેના ઉપર હુમલો કરી દીધો હતો, જેથી બાળક ગભરાઈ ગયું હતું અને દોડવા જતાં તેને સામાન્ય બચકું ભરી લીધું હતું. કૂતરાના હુમલાથી બાળકને દાંત બેસી ગયા હતા.

એક જ ફ્લેટમાં રહેતાં બે બાળક પર કૂતરાનો હુમલો

બાળક ખૂબ જ ગભરાઈ ગયું હતું અને તરત જ નીચે પડી જતાં ઊભું થઈ અને તેની માતાને જાણ કરી હતી. આ બાબતે બાળકના પિતાને જાણ કરવામાં આવતા તેઓ પણ તાત્કાલિક ઘરે આવી ગયા હતા. ત્યાર બાદ બાળકના પિતાને જાણવા મળ્યું હતું કે સોસાયટીમાં રહેતી અન્ય એક વ્યક્તિના બાળકને પણ આ કૂતરું કરડ્યું હતું, જેથી બંને બાળકોને તાત્કાલિક સારવાર માટે ખાનગી હોસ્પિટલમાં લઈ ગયા હતા અને ત્યાં સારવાર આપવામાં આવી હતી. એક જ ફ્લેટમાં રહેતાં બે બાળકોને કૂતરું કરડવાની ઘટના બની હતી.

બાળકના પિતાએ પોલીસ ફરિયાદ નોંધાવી

જર્મન શેફર્ડ કૂતરા દ્વારા એક બાળકને જમણા પગના સાથળના ભાગે અને એક બાળકને જમણી હાથની આંગળીઓ ઉપર બચકું ભરીને ઇજાગ્રસ્ત કરવામાં આવ્યા હતા. પાપાબેન વનિયર નામની મહિલાએ માણસોની જિંદગી જોખમાય એ રીતે પોતાના પાલતું કૂતરા જર્મન શેફર્ડને લઈને પાર્કિંગમાં ફરી રહ્યાં હતાં. આ ઘટના બનતાં બાળકના પિતાએ રામોલ રામોલ સ્ટેશનમાં મામલે ફરિયાદ નોંધાવી છે.

ડોગમાલિક સામે બેદરકારીની પોલીસ ફરિયાદ

ન્યૂ મણિનગર વિસ્તારમાં આવેલા શરણમ એલિગન્સમાં રહેતા નિતેશ ગુંદેલાએ રામોલ પોલીસ સ્ટેશનમાં તેમની જ સોસાયટીમાં રહેતાં પાપાબેન ઉર્ફે સંગીતા વનિયર વિરુદ્ધ બેદરકારીની ફરિયાદ કરી છે. નિતેશ ગુંદેલા પત્ની, દીકરી અને દીકરા સાથે રહે છે અને ડ્રાઈવિંગ સ્કૂલ ચલાવે છે. ગઈકાલે નિતેશ ગુંદેલા પોતાની ઓફિસ પર હાજર હતા ત્યારે રિંકીનો ફોન આવ્યો કે સવા એક વાગ્યા આસપાસ મારો દીકરો ફ્લેટમાં રમી રહ્યો હતો ત્યારે સંગીતાના પાલતું ડોગ જર્મન શેફર્ડે તેના પગની સાથળના ભાગે બચકું ભરી લીધું હતું.

દીકરાને ડોગે બચકું ભર્યાના સમાચાર મળતાં જ નિતેશ ગુંદેલા પોતાના ઘરે પહોંચી ગયા હતા. નિતેશે દીકરાને પૂછ્યું તો તેણે જણાવ્યુ હતું કે હું ફ્લેટ નીચે નાના છોકરાઓ સાથે રમતો હતો, એ સમયે કૂતરાએ મને પગે બચકું ભરી લીધું હતું. નિતેશ તરત જ દીકરાને હોસ્પિટલ લઈ જવા માટે નીકળ્યા ત્યારે જ ફ્લેટમાં રહેતા ગણેશ પાટીલ તેને મળ્યા હતા અને કહેવા લાગ્યા કે સંગીતાના કૂતરાએ તેના દીકરાને પણ બચકું ભર્યુ છે. બન્ને બાળકોને તાત્કાલિક મણિનગર ખાતે આવેલી ખાનગી હોસ્પિટલમાં લઈ ગયા હતા, જ્યાં તેમને વેક્સિન આપી હતી.

સોસાયટીવાસીઓમાં આક્રોશ, ડોગમાલિક દાદાગીરી પર ઊતર્યા

એક જ દિવસે બે બાળકને શેફર્ડ ડોગે બાઈટ કરતાંની સાથે જ સોસાયટીના લોકો આક્રોશમાં આવી ગયા હતા અને સંગીતા તેમજ તેના પતિ પલાનીસ્વામી સાથે બેઠક કરી હતી. સોસાયટીના રહીશોએ કૂતરાને નહીં રાખવાની માગ કરી હતી, પરંતુ પલાનીસ્વામી અને સંગીતા દાદાગીરી પર ઊતરી આવ્યાં હતાં. આ મામલે નિતેશ ગુંદેલાએ રામોલ પોલીસ સ્ટેશનમાં પોલીસ ફરિયાદ કરી છે. પોલીસે ગુનો નોંધીને તપાસ શરૂ કરી છે. અયાનને કૂતરો કરડ્યો તેના સીસીટીવી ફૂટેજ પણ સામે આવતાં લોકોમાં આક્રોશ જોવા મળી રહ્યો છે.

મોડીરાત સુધી હાઇ વોલ્ટેજ ડ્રામા ચાલ્યો

કૂતરાને લઈને મોડીરાત સુધી સોસાયટીમાં હાઈ વોલ્ટેજ ડ્રામા ચાલ્યો હતો. સોસાયટીના 300થી વધુ રહીશો એક થઈ ગયા હતા અને કૂતરાને હટાવવાની માગ કરી હતી, જોકે દંપતીએ તમામની વાત અવગણી હતી. આ બાદ મામલો પોલીસ સ્ટેશન સુધી પહોંચ્યો હતો, જ્યા પલાનીસ્વામી દાદાગીરી કરવા લાગ્યો હતો, જેથી એક રહીશે સમગ્ર ઘટના એક્સ પર કરતાં મામલો છેક ઉચ્ચ અધિકારીઓ સુધી પહોંચ્યો હતો. આ મામલે સંગીતા વિરુદ્ધ ગુનો નોંધ્યો છે. જ્યારે કૂતરાને રાખવા મામલે હજુ સુધી અસમંજસ છે.

એક વર્ષ પહેલાં બચકું ભર્યું ત્યારે માફી માગી હતી, થોડા દિવસ નિયમોનું પાલન કર્યું

આ અંગે ફરિયાદી નિતેશે જણાવ્યું હતું કે સંગીતાના કૂતરાએ એક વર્ષ પહેલાં સોસાયટીમાં રહેતી એક વ્યકિતને બચકું ભર્યું હતું ત્યારે પણ લોકો રોષે ભરાયા હતા. જે-તે સમયે સંગીતા અને તેના પતિએ માફી માગી લીધી હતી અને હવે કૂતરું કોઈને નહીં કરડે એવી બાંયધરી આપી દીધી હતી, જોકે જે-તે સમય પર કોઈ કાર્યવાહી કરી નહીં, પરંતું ગઈકાલે બે બાળક ઉપર એટેક થતાં અંતે ફરિયાદ કરવી પડી છે. પહેલાં જ્યારે ડોગે બચકું ભર્યું ત્યારે સંગીતા અને પલાનીસ્વામીએ માફી માગી લીધી હતી, કૂતરાને તેમની પાસે રાખવા માટે પલાનીસ્વામીએ કેટલાક નિયમો બનાવી લીધા હતા. કૂતરાના મોઢા પર માસ્ક બાંધીને રાખવું, મોડીરાતે એને બહાર લઈને નીકળવું. થોડા દિવસ નિયમોનું પાલન થયું હતું, પરંતુ બાદમાં નિયમોને નેવે મૂકી દેવાયા હતા.

50 હજાર પાલતું શ્વાનમાંથી 19,000નું જ રજિસ્ટ્રેશન થયું

13 મે, 2025ના રોજ અમદાવાદના હાથીજણ વિસ્તારમાં આવેલી રાધે રેસિડેન્સીમાં એક પાલતું રોટવીલર ડોગે રાત્રિના 9:00 વાગ્યાથી 9:30 વાગ્યા દરમિયાન 4 માસની બાળકી પર હુમલો કરી દેતા તેનું મોત નીપજ્યું હતું. આ ઘટના બાદ અમદાવાદ મ્યુનિસિપલ કોર્પોરેશન દ્વારા શહેરમાં રહેલા 50 હજાર પેટ ડોગના રજિસ્ટ્રેશનની કાર્યવાહી કરવામાં આવે છે. પરંતુ શહેરમાં પેટ ડોગ ધરાવનારા માલિકો દ્વારા હજી પણ રજિસ્ટ્રેશન કરાવવાની પ્રક્રિયા ખૂબ ધીમી છે. 1 જાન્યુઆરી 2025થી આજ દિન સુધીમાં 16500થી વધુ પેટ ડોગ માલિકો દ્વારા તેમના 19000 જેટલા પેટ ડોગના રજિસ્ટ્રેશન થયા છે. લોકો હજી પણ પેટ ડોગના રજીસ્ટ્રેશન કરાવી રહ્યા નથી. પેટ ડોગની રજિસ્ટ્રેશન ફી હાલ 2000 છે.