સોના-ચાંદીના ભાવમાં મોટો કડાકો:સોનું 21 દિવસમાં ₹10,774 સસ્તું થયું, ચાંદી 24 દિવસમાં 30 હજાર તૂટી
સોનાનો ભાવ 21 દિવસમાં ₹10,774 ઘટીને આજે ₹1,20,100 પ્રતિ 10 ગ્રામ થયો છે. 17 ઓક્ટોબરે તે ₹1,30,874ના ઓલટાઇમ હાઇ હતું.
ઇન્ડિયા બુલિયન એન્ડ જ્વેલર્સ એસોસિએશન (IBJA) અનુસાર, 7 નવેમ્બરે સોનાનો ભાવ ₹570 ઘટ્યો હતો. આ પહેલા, ગુરુવારે, તેનો ભાવ ₹1,20,670 પ્રતિ 10 ગ્રામ હતો.
ચાંદીના ભાવમાં ₹33 રૂપિયાનો વધારો
ચાંદીના ભાવ ₹33નો નજીવો વધારો થતા કિંમત ₹1,48,010 પ્રતિ કિલો થઈ છે. 14 ઓક્ટોબરે તે ₹1,78,100ના ઓલટાઇમ હાઇ પર પહોંચ્યું હતું. આનો અર્થ એ થયો કે છેલ્લા 24 દિવસમાં તેની કિંમત ₹29,825 ઘટી છે.
IBJA સોનાના ભાવમાં 3% GST, મેકિંગ ચાર્જ અને જ્વેલર્સ માર્જિનનો સમાવેશ થતો નથી. તેથી, કિંમત દરેક શહેરોમાં અલગ અલગ હોય છે. આ દરોનો ઉપયોગ RBI દ્વારા સોવરિન ગોલ્ડ બોન્ડના દર નક્કી કરવા માટે કરવામાં આવે છે. ઘણી બેંકો ગોલ્ડ લોનના દર નક્કી કરવા માટે તેનો ઉપયોગ કરે છે.
સોના અને ચાંદીના ભાવમાં ઘટાડાને કારણે
- ભારતમાં મોસમી ખરીદી પુર્ણ થઈ: દિવાળી જેવા તહેવારો પછી ભારતમાં સોના અને ચાંદીની ખરીદી ધીમી પડી ગઈ છે. જેના કારણે સોના અને ચાંદીની માંગમાં ઘટાડો થયો છે.
- વૈશ્વિક તણાવમાં ઘટાડો: સોના અને ચાંદીને 'સેફ હેવન' માનવામાં આવે છે, એટલે કે લોકો મુશ્કેલ સમયમાં તેમને ખરીદે છે. વૈશ્વિક તણાવમાં ઘટાડો થવાથી તેમના ભાવમાં ઘટાડો થયો છે.
- પ્રોફિટ ટેકિંગ અને ઓવરબોટ સિગ્નલ: રોકાણકારો તેજી પછી પ્રોફિટ બુક કરી રહ્યા છે. રિલેટિવ સ્ટ્રેન્થ ઇન્ડેક્સ (RSI) જેવા ટેકનિકલ ઈન્ડિકેટર્સ દર્શાવે છે કે કિંમતો ઓવરબોટ ઝોનમાં પહોંચી ગઈ છે. તેથી, ટ્રેન્ડ ફોલોઅર્સ અને ડીલરો વેચાણ શરૂ કરી દીધું છે.
આ વર્ષે સોનું ₹44,069 અને ચાંદી ₹61,993 મોંઘા થયા
- આ વર્ષે અત્યાર સુધીમાં સોનાના ભાવમાં ₹44,069નો વધારો થયો છે. 31 ડિસેમ્બર, 2024ના રોજ, 24 કેરેટ સોનાના 10 ગ્રામનો ભાવ ₹76,162 હતો, જે હવે વધીને ₹1,20,231 થયો છે.
- આ દરમિયાન ચાંદીના ભાવમાં પણ ₹61,993નો વધારો થયો છે. એક કિલોગ્રામ ચાંદીનો ભાવ, જે 31 ડિસેમ્બર, 2024ના રોજ ₹86,017 હતો, તે હવે વધીને ₹1,48,010 પ્રતિ કિલોગ્રામ થયો છે.
સોનું ખરીદતી વખતે આ 2 બાબતોનું ધ્યાન રાખો
1. ફક્ત સર્ટિફાઈડ સોનું જ ખરીદો
હંમેશાં બ્યૂરો ઓફ ઇન્ડિયન સ્ટાન્ડર્ડ્સ (BIS)ના હોલમાર્ક ધરાવતું સર્ટિફાઈડ સોનું જ ખરીદો. સોના પર 6-અંકનો હોલમાર્ક કોડ હોય છે. એને હોલમાર્ક યુનિક આઇડેન્ટિફિકેશન નંબર અથવા HUID કહેવામાં આવે છે. આ નંબર આલ્ફાન્યુમેરિક છે, એટલે કે કંઈક આના જેવો - AZ4524. હોલમાર્કિંગ દ્વારા સોનું કેટલા કેરેટનું છે એ જાણી શકાય છે.
2. કિંમત ક્રોસ ચેક કરો
ખરીદીના દિવસે સોનાનું ચોક્કસ વજન અને એની કિંમત બહુવિધ સ્ત્રોતો (જેમ કે ઇન્ડિયા બુલિયન એન્ડ જ્વેલર્સ એસોસિયેશનની વેબસાઇટ) પરથી તપાસો. સોનાની કિંમત 24 કેરેટ, 22 કેરેટ અને 18 કેરેટ પ્રમાણે બદલાય છે. 24 કેરેટ સોનાને સૌથી શુદ્ધ સોનું માનવામાં આવે છે, પરંતુ એમાંથી ઘરેણાં બનાવવામાં આવતા નથી, કારણ કે એ ખૂબ જ નરમ હોય છે. સામાન્ય રીતે 22 કેરેટ કે તેથી ઓછા કેરેટ સોનાનો ઉપયોગ ઘરેણાં માટે થાય છે.
શહેરોમાં સોનાના ભાવમાં ફેરફાર થવાના 4 કારણો
1. ટ્રાન્સપોર્ટેશન ખર્ચ: સોનું એક ફિઝિકલ વસ્તુ છે, તેથી તેનું પરિવહન મોંઘુ છે. મોટાભાગની આયાત હવાઈ માર્ગે થાય છે. ત્યારબાદ સોનાને આંતરિક ભાગમાં પહોંચાડવું પડે છે. ટ્રાન્સપોર્ટેશન ખર્ચમાં ફ્યુઅલ, સુરક્ષા, વાહનો, સ્ટાફ અને અન્ય ખર્ચનો સમાવેશ થાય છે.
2. સોનાની ખરીદીનું પ્રમાણ: શહેર અને રાજ્ય પ્રમાણે સોનાની માંગ બદલાય છે. ભારતના કુલ સોનાના વપરાશમાં દક્ષિણ ભારતનો હિસ્સો આશરે 40% છે. અહીં, વેચાણકર્તાઓ જથ્થાબંધ સોનું ખરીદે છે, જેનાથી કિંમતો ઓછી થાય છે. જોકે, ટાયર-2 શહેરોમાં કિંમતો વધુ હોય છે.
3. સ્થાનિક જ્વેલરી એસોસિએશન: ઉદાહરણ તરીકે, તમિલનાડુમાં, સોનાનો દર જ્વેલર્સ અને ડાયમંડ ટ્રેડર્સ એસોસિએશન દ્વારા નક્કી કરવામાં આવે છે. તેવી જ રીતે, દેશભરમાં ઘણા અન્ય સંગઠનો છે જે ભાવ નક્કી કરે છે.
4. સોનાની ખરીદ કિંમત: વિવિધ શહેરોમાં સોનાના ભાવને અસર કરતું આ સૌથી મોટું પરિબળ છે. જે ઝવેરીઓએ પોતાનો સ્ટોક ઓછી કિંમતે ખરીદ્યો છે તેઓ ઓછા દર વસૂલ કરી શકે છે.
