ગુજરાતમાં દારૂબંધી હોવાની વાત છે પરંતુ, શહેરમાં ઠેર-ઠેર દારૂ વેચાઈ રહ્યો છે અને પોલીસની હાજરીમાં જ કેટલાક લોકો દારૂ પીને પોલીસ કમ્પાઉન્ડમાં ધતિંગ કરતા હોય છે. આવો વધુ એક કિસ્સો શહેરના પાલડી પોલીસ સ્ટેશનમાં બન્યો છે.

પોલીસ કમ્પાઉન્ડમાં જ બે શખ્સોએ પીધેલી હાલતમાં બોલાચાલી કરી

અમદાવાદમાં શનિવારે મોડી રાત્રે પાલડી પોલીસ સ્ટેશનના કમ્પાઉન્ડમાં જ પોલીસની સામે બે શખસો દારૂ પીધેલી હાલતમાં ઝઘડો કરતા હોવાની ઘટના બની છે. પોલીસ કમ્પાઉન્ડમાં જ બે શખ્સ દારૂ પીધેલી હાલતમાં પોલીસની સામે બોલાચાલી કરી રહ્યા હતા. પોલીસકર્મી અને મહિલાની હાજરીમાં જેમ ફાવે તેમ બોલી રહ્યા હતા. ઝઘડા બાબતે પોલીસ કંટ્રોલરૂમનો મેસેજ થયો હતો અને ત્યારબાદ આ બંને સમક્ષ પોલીસ સ્ટેશન કમ્પાઉન્ડમાં બોલાચાલી કરતા હતા. આ સમગ્ર બાબત અંગેનો વીડિયો પણ સોશિયલ મીડિયામાં વાઈરલ થયો હતો. ત્યારબાદ પાલડી પોલીસે આ મામલે ગુનો નોંધી બંનેની અટકાયત કરી હતી અને બંને વિરુદ્ધ કાયદેસરની કાર્યવાહી કરવામાં આવી હતી.