10 નવેમ્બરના રોજ દિલ્હીમાં લાલ કિલ્લા મેટ્રો સ્ટેશન પાસે થયેલા કાર બોમ્બ વિસ્ફોટ અંગે મહત્ત્વપૂર્ણ ખુલાસાઓ સામે આવ્યા છે. આ કેસમાં ધરપકડ કરાયેલા ફરીદાબાદ આતંકવાદી મોડ્યુલના સભ્ય ડૉ. શાહીન શાહિદે તેના સાથી આતંકવાદી ડૉક્ટરો સાથે મળીને દેશભરમાં હુમલાઓનું કાવતરું ઘડ્યું હોવાની કબૂલાત કરી છે.

પોલીસ સૂત્રોના જણાવ્યા અનુસાર, શાહીને પૂછપરછ દરમિયાન ખુલાસો કર્યો હતો કે તે છેલ્લા બે વર્ષથી વિસ્ફોટકો એકઠા કરી રહી હતી. વિસ્ફોટના દિવસે i20 કાર લાલ કિલ્લા સુધી પહોંચતા પહેલા દિલ્હીના ઘણા વિસ્તારોમાંથી પસાર થઈ હતી. કાર બપોરે 2:30 વાગ્યે કનોટ પ્લેસ પહોંચી હતી અને થોડીવાર પછી ત્યાંથી નીકળી ગઈ હતી.

સૂત્રોએ જણાવ્યું હતું કે આતંકવાદી, અલ ફલાહ યુનિવર્સિટીના સહાયક પ્રોફેસર ડૉ. ઉમર નબી, દિલ્હી-એનસીઆર અને પુલવામામાં સતત દરોડાને કારણે દબાણ હેઠળ હતો. તે ઉતાવળે ફરીદાબાદથી એક કારમાં નીકળી ગયો જેમાં અધૂરો IED હતો, જેનાથી વિસ્ફોટ થયો. આ કારણે જ બ્લાસ્ટની અસર સીમિત રહી અને ક્રેટર કે છરા મળ્યા નહીં

કાર બ્લાસ્ટ સુસાઇડ કાર બોમ્બિંગ જેવો હુમલો નહોતો

સૂત્રોના જણાવ્યા અનુસાર, કાર કોઈ નિશાન પર ટકરાઈ ન હતી કે કોઈ ઇમારતમાં ઘૂસી ન હતી, એટલે કે આ આત્મઘાતી કાર બોમ્બ વિસ્ફોટ નહોતો. વિસ્ફોટમાં ઉમરનું મોત થયું હતું. પોલીસે વિસ્ફોટના કાટમાળમાંથી મળેલા શરીરના ભાગોને ઓળખવા માટે તેની માતા પાસેથી ડીએનએ નમૂના એકત્રિત કર્યા છે.

સોમવારે સાંજે લગભગ 6:52 વાગ્યે લાલ કિલ્લા મેટ્રો સ્ટેશનના ગેટ નંબર 1 પાસે એક સફેદ i20 કારમાં વિસ્ફોટ થયો હતો, જેમાં 12 લોકો માર્યા ગયા હતા. સૂત્રો કહે છે કે કારમાં વિસ્ફોટક સામગ્રી ફરીદાબાદમાં જપ્ત કરાયેલી સામગ્રી જેવી જ હતી. આ મોડ્યુલ જૈશ-એ-મોહમ્મદ અને અંસાર ગઝવત-ઉલ-હિંદ સાથે જોડાયેલું છે, જે જમ્મુ અને કાશ્મીર, હરિયાણા અને ઉત્તર પ્રદેશમાં સક્રિય છે.