તાલાલા શહેર નજીક ઉના તરફ જતા ગુંદરણ રોડ પર આવેલા રિલાયન્સ પેટ્રોલપંપ પાસેના જોગીદળ નાળામાંથી આજે સવારે એક યુવકની લાશ મળી આવી હતી. મૃતકના હાથમાં ધજા હતી અને તેની ઓળખ જેતપુરના યુવાન તરીકે થઈ છે.

સ્થાનિકોએ પાણીમાં તરતી લાશ જોઈને તાલાલા પોલીસને જાણ કરી હતી. માહિતી મળતા જ તાલાલા પોલીસના જમાદાર યાશીનશા સહામદાર અને તેમનો સ્ટાફ ઘટનાસ્થળે પહોંચી ગયો હતો. તરવૈયાઓની મદદથી લાશને પાણીમાંથી બહાર કાઢવામાં આવી હતી.

પ્રાથમિક તપાસમાં મૃતકના હાથમાં ધજા જોવા મળી હતી અને તેની સાથે એક બેગ પણ હતી. બેગની તલાશી લેતા તેમાંથી પલળી ગયેલું રેશનકાર્ડ અને આધારકાર્ડની ઝેરોક્ષ કોપી મળી આવી હતી, જેમાં જેતપુરનું સરનામું નોંધાયેલું હતું.

પોલીસે મૃતક યુવાનની લાશને પોસ્ટમોર્ટમ માટે ખસેડી વધુ તપાસ હાથ ધરી છે. હાથમાં ધજા હોવાથી યુવાન પદયાત્રાએ નીકળ્યો હોવાનું પ્રાથમિક અનુમાન છે. પોલીસ તેમની સંપૂર્ણ ઓળખ મેળવી પરિવારનો સંપર્ક કરવાની કાર્યવાહી કરી રહી છે.