​​​​​​પર્વતીય પ્રદેશોમાંથી ફૂંકાતા બર્ફીલા પવનોને કારણે ઠંડીએ હાહાકાર મચાવ્યો છે. દિલ્હી, બિહાર, મધ્યપ્રદેશ અને રાજસ્થાન સહિત અનેક રાજ્યોમાં તાપમાન ઝડપથી ઘટી રહ્યું છે. ઉત્તરાખંડના બદ્રીનાથ મંદિરમાં, પારો માઈનસ 8 ડિગ્રી સુધી ઘટી ગયો છે, જેના કારણે ધોધ અને તળાવો થીજી ગયા છે.

2021 પછી પહેલી વાર, રાજસ્થાનમાં નવેમ્બરમાં પારો 5 ડિગ્રીથી નીચે ગયો છે. ફતેહપુરમાં છેલ્લા 24 કલાકમાં સૌથી ઓછું 4.9 ડિગ્રી તાપમાન નોંધાયું હતું. રાજ્યભરના 15 શહેરોમાં 5 થી 10 ડિગ્રી વચ્ચે તાપમાન નોંધાયું હતું. માઉન્ટ આબુમાં, 15 વર્ષમાં પહેલી વાર નવેમ્બરમાં પારો શૂન્ય પર પહોંચી ગયો છે, જેના કારણે ઝાકળના ટીપાં થીજી ગયા છે. ગયા વર્ષે, 10 ડિસેમ્બર, 2024ના રોજ માઉન્ટ આબુમાં પહેલી વાર ઝાકળના ટીપાં બરફમાં ફેરવાઈ ગયા હતા.

મંગળવારે મધ્યપ્રદેશના ભોપાલ, ઇન્દોર અને રાજગઢ સહિત 26 જિલ્લાઓમાં કોલ્ડવેવનું એલર્ટ આપવામાં આવ્યું છે. ઇન્દોરમાં આજથી સ્કૂલોનો સમય બદલીને સવારે 9 વાગ્યા કરવામાં આવ્યો છે. ભોપાલમાં, નર્સરીથી આઠમા ધોરણ સુધીની શાળાઓ સવારે 8:30 વાગ્યા પછી શરૂ કરવાનો આદેશ આપવામાં આવ્યો છે.

સોમવારે દિલ્હીમાં ત્રણ વર્ષમાં સૌથી ઠંડી સવારનો અનુભવ થયો. સોમવારે સવારે દિલ્હીમાં લઘુત્તમ તાપમાન 8.7 ડિગ્રી નોંધાયું હતું. નવેમ્બરમાં અગાઉનું સૌથી ઓછું તાપમાન 29 નવેમ્બર, 2022ના રોજ 7.3 ડિગ્રી હતું. મંગળવારે પણ ધુમ્મસ છવાયું હતું.