20 વર્ષ પછી લાલુ પરિવારને 10 સર્ક્યુલર રોડ સ્થિત સરકારી આવાસ (રાબડી આવાસ) ખાલી કરવાની નોટિસ મળી છે. બિહાર ભવન નિર્માણ વિભાગે આ નોટિસ મોકલી છે.

આના બરાબર 10 દિવસ પહેલા એટલે કે 15 નવેમ્બરે લાલુની દીકરી રોહિણી આચાર્યા આ જ ઘરમાંથી રડતા-રડતા નીકળી હતી. આ પછી વધુ ત્રણ દીકરીઓએ રાબડી આવાસ છોડી દીધું હતું. તેજપ્રતાપને લાલુ યાદવ પહેલાથી જ પાર્ટી અને પરિવારમાંથી બહાર કરી ચૂક્યા છે. ત્યારથી તેઓ પોતાના આ જ સરકારી આવાસમાં રહી રહ્યા છે.

રાબડી આવાસમાં હાલમાં લાલુ યાદવ, રાબડી દેવી, તેજસ્વી યાદવ અને તેમનો પરિવાર રહે છે.

લાલુ જેલમાં ગયા હતા ત્યારે રાબડીને CM બનાવ્યા હતા...ત્યારથી રાબડી આવાસ

23 જૂન, 1997ના રોજ લાલુ સહિત 55 લોકો વિરુદ્ધ CBIએ ચારા કૌભાંડ કેસમાં ચાર્જશીટ દાખલ કરી. તેમની વિરુદ્ધ 63 કેસ નોંધવામાં આવ્યા હતા. લાલુ સમજી ગયા હતા કે ધરપકડ નિશ્ચિત છે. 25 જુલાઈ 1997ની સાંજે તેમણે રાજીનામાની જાહેરાત કરી અને પત્ની રાબડી દેવીને CM બનાવ્યા.

પછી એકવાર જ્યારે લાલુને વંશવાદ વિશે પૂછવામાં આવ્યું, ત્યારે તેમણે કહ્યું હતું, ‘હું રાજકારણમાં શક્તિ મેળવવા આવ્યો છું અને હું તેને ફક્ત એટલા માટે છોડીશ નહીં, કારણ કે કોઈએ મારા પર આરોપ લગાવ્યા છે. મારી પત્નીને મુખ્યમંત્રી બનાવીને મેં શું ભૂલ કરી? શું હું મારી સત્તા મારા રાજકીય વિરોધીઓના હાથમાં સોંપી દેત?’

પત્નીને CM બનાવ્યા પછી 30 જુલાઈ, 1997ના રોજ લાલુ યાદવે ચારા કૌભાંડ કેસમાં આત્મસમર્પણ કર્યું અને ડિસેમ્બર 1997 સુધી જેલમાં રહ્યા. જોકે, લાલુ યાદવ RJDના રાષ્ટ્રીય અધ્યક્ષ બન્યા રહ્યા. ત્યારબાદ રાબડી દેવીને 2005માં 10 સર્ક્યુલર રોડ સ્થિત સરકારી આવાસ ફાળવવામાં આવ્યું હતું.

રડતાં રડતાં રોહિણીએ છોડ્યું હતું રાબડી આવાસ