મહેસાણામાં BLOનું હાર્ટએટેકથી મોત: આચાર્ય રાત્રે 2 વાગ્યે ઉઠી SIRની ઓનલાઈન કામગીરી કરી રહ્યા હતા ને ઢળી પડ્યા
મહેસાણા જિલ્લાના સતલાસણા તાલુકાના સુદાસણ ગામે એક અત્યંત દુઃખદ ઘટના સામે આવી છે. ગામની કન્યાશાળાના મુખ્ય શિક્ષક અને બી.એલ.ઓ.તરીકે ફરજ બજાવતા દિનેશ રાવળનું હૃદયરોગના હુમલાથી નિધન થયું છે.મળતી માહિતી અનુસાર નેટ કનેક્ટિવિટીની સમસ્યાને કારણે તેઓ દિવસે કામગીરી કરી શકતા નહોતા. જેથી, તેઓ રાત્રે લગભગ 2 વાગ્યે જાગીને SIR ની કામગીરી કરી રહ્યા હતા.
ત્યારે જ તેમને છાતીમાં તીવ્ર દુખાવો ઉપડ્યો હતો. તાત્કાલિક તેમને સારવાર અર્થે વડનગર ખાતે ખસેડવામાં આવ્યા હતા પરંતુ માર્ગમાં જ તેમનું કરુણ મોત નીપજ્યું હતું.સુદાસણ ગામની શાળા તેમજ સમગ્ર ગામમાં શોકની ગમગીની છવાઈ ગઈ છે.
સુદાસણા પગાર કેન્દ્ર આચાર્ય ગોવિંદસિંહ બારડ એ જણાવ્યું કે જે મૃતક છે એ સુદાસણા પ્રાથમિક કન્યા શાળાના આચાર્ય છે દિનેશકુમાર મેલાભાઈ રાવળ અને સુદાસણા પ્રાથમિક કન્યા શાળાની અંદર 17 જાન્યુઆરી 2001 થી એ સર્વિસ કરે છે.બીએલઓ તરીકેનું કામ એમનું સુદાસણાના ભાગ નંબર 3 માં બૂથ નંબર 38 ની અંદર હતું. અને અત્યારે એસઆઈઆર ની કામગીરી ચાલી રહી છે એ કામ એ કરતા હતા.
હવે બધા જ જાણે છે એ પ્રકારે, એસઆરની કામગીરીની અંદર જે ફોર્મને અપલોડ કરવાના હોય છે.ઓનલાઈન કરવાના હોય છે. એની એપ્લિકેશન બરાબર કામ કરતી ન હોવાથી દિનેશભાઈ સતત છેલ્લા બે-ચાર દિવસથી રાત્રે ઊઠી અને એ ફોર્મને અપલોડ કરવાનું કામગીરી કરતા હતા.
આજ રાત્રે પણ એ લગભગ 2 વાગ્યાની આસપાસ ઊઠી અને એ ફોર્મને અપલોડ કરવાનું કામ કરતા હતા એવું એમના પરિવારનું કહેવું છે. એમના પરિવારના જણાવ્યા મુજબ આ કામ કરતા હતા એ દરમિયાન એમને છાતીની અંદર દુખાવો ઊપડ્યો. પરિવાર સભ્યોને જાણ થતાં એમને એમના ઓળખીતા મિત્રોને બોલાવ્યા. ગામની અંદર દવાખાને લઈ ગયા પરંતુ ત્યાં સારવાર મળી નહીં ડૉક્ટર ઉપલબ્ધ નહોતા. એટલે એ લોકો અહીંયા વડનગર સિવિલમાં લાવ્યા. સિવિલમાં ડૉક્ટર એ એમને મૃત જાહેર કર્યા છે.
એસઆરની કામગીરી દિનેશભાઈની લગભગ 70% જેવી પૂરી હતી. અને કામ પણ એમનું સારું હતું. શિક્ષકોમાં સ્ટ્રેસ એ વાતનો હતો કે ટૂંકાગાળાની અંદર જે એમને આપેલું હતું એ ગોલ એમને પૂરો કરવાનો હતો. અને એમાં ખાસ કરીને જે સર્વર છે એ બરાબર કામ કરતું નથી. એટલે ફોર્મ તો એકત્રિત કર્યા હોય એમાં માહિતી ભરવાની હોય, પરંતુ એ જ્યારે અપલોડ કરવાના હોય ત્યારે સર્વર બરાબર કામ ન કરતું હોય, કામગીરી પૂરી કરવાની હોય, એટલે એ દબાણ થોડું રહેતું હોય એમને માનસિક રીતે. અને એ કામ એ રાત્રે કરતા હતા, એ દરમિયાન આ બનાવ બન્યો છે, હું એવું કહેવા માંગું છું.
