ગુરુવારે અમેરિકામાં US એરફોર્સના થંડરબર્ડ્સ સ્ક્વોડ્રનનું એક F-16 લડાકુ વિમાન ક્રેશ થયું. દુર્ઘટનાની થોડી સેકન્ડ પહેલાં પાઇલટ સુરક્ષિત બહાર નીકળી ગયો હતો, જેનાથી તેનો જીવ બચી ગયો.

આ અકસ્માત સ્થાનિક સમય મુજબ સવારે 10:45 વાગ્યે દક્ષિણ કેલિફોર્નિયાના ટ્રોના નજીકના રણ વિસ્તારમાં થયો હતો. વિમાન ટ્રોના એરપોર્ટથી લગભગ ત્રણ કિલોમીટર દૂર ક્રેશ થયું હતું. એરપોર્ટ મેનેજરે જણાવ્યું હતું કે લશ્કરી વિમાનો વારંવાર આ વિસ્તાર ઉપરથી ઉડે છે.

સોશિયલ મીડિયા પર આવેલા વીડિયોમાં જોવામાં આવ્યું કે વિમાન ઝડપથી નીચે પડી રહ્યું હતું અને પાઇલટ પેરાશૂટના સહારે બહાર નીકળી આવ્યો હતો. જમીન સાથે ટકરાતાં જ વિમાનમાં મોટો ધમાકો થયો અને કાળો ધુમાડો આકાશમાં છવાઈ ગયો.

F-16ની કિંમત 1.70 હજાર કરોડ રૂપિયા

એરફોર્સના 2021ના ડેટા મુજબ, એક F-16 ફાઇટિંગ ફાલ્કનની કિંમત લગભગ 18.8 મિલિયન ડોલર (લગભગ ₹170 હજાર કરોડ) છે. આ એરક્રાફ્ટ થંડરબર્ડ્સ સ્ક્વૉડ્રનનું હતું. આ ટીમ લાંસ વેગાસ પાસેના નેલિસ એરફોર્સ બેઝ પરથી કામ કરે છે. આ ટીમ તેના એર શો અને ખતરનાક સ્ટંટ્સ માટે દુનિયાભરમાં જાણીતી છે.

થંડરબર્ડ્સ ટીમે જણાવ્યું કે તાલીમ મિશન દરમિયાન પાઇલટે સફળતાપૂર્વક ઇજેક્ટ કર્યું. પાઇલટને સામાન્ય ઈજાઓ થઈ અને તેને રિડ્જક્રેસ્ટની હોસ્પિટલમાં દાખલ કરવામાં આવ્યો.

સ્થાનિક ફાયર વિભાગે જણાવ્યું કે ઘટનાસ્થળે માત્ર પાઇલટ હાજર હતો અને આગથી આસપાસના વિસ્તારને કોઈ ખતરો નથી.

ક્રેશનું કારણ હજુ સ્પષ્ટ નથી

અધિકારીઓના જણાવ્યા અનુસાર, સવારે 6 થંડરબર્ડ્સ જેટ તાલીમ માટે ઉડ્યા હતા, પરંતુ તેમાંથી માત્ર પાંચ જ પાછા ફર્યા. પ્રારંભિક માહિતી અનુસાર, વિમાન ચાઇના લેક નેવલ એર વેપન્સ સ્ટેશન નજીક ક્રેશ થયું હતું.

આ વિસ્તારનો ઉપયોગ ઘણીવાર સૈન્ય તાલીમ માટે થાય છે. થંડરબર્ડ્સના એર શો અને તાલીમ મિશનમાં F-16 ફાઇટિંગ ફાલ્કન મહત્વપૂર્ણ ભૂમિકા ભજવે છે.

એરફોર્સની 57મી વિંગ પબ્લિક અફેર્સ ઓફિસ અનુસાર, દુર્ઘટનાની તપાસ ચાલુ છે અને ક્રેશ સાઇટની તપાસ પૂર્ણ થયા પછી વધુ માહિતી શેર કરવામાં આવશે.

25થી વધુ દેશો F-16નો ઉપયોગ કરે છે

F-16 અમેરિકાનું પ્રખ્યાત અને શક્તિશાળી ફાઇટર જેટ છે, જેને 1970ના દાયકામાં જનરલ ડાયનેમિક્સ દ્વારા બનાવવામાં આવ્યું હતું. હવે તેને અમેરિકી સંરક્ષણ કંપની લોકહીડ માર્ટિન બનાવે છે. પાકિસ્તાન સહિત 25થી વધુ દેશો F-16નો ઉપયોગ કરે છે.

F-16એ 2 ફેબ્રુઆરી 1974ના રોજ પ્રથમ વખત ઉડાન ભરી હતી. તેને 21 જુલાઈ 1980ના રોજ "ફાઈટિંગ ફાલ્કન" નામ આપવામાં આવ્યું હતું. વર્ષ 1976થી અત્યારસુધીમાં 4,600થી વધુ F-16 જેટ વિવિધ દેશો માટે બનાવવામાં આવ્યાં છે.

F-16ની ઝડપ 2414 કિલોમીટર પ્રતિ કલાક છે. તેની રેન્જ 4220 કિલોમીટર સુધીની છે. તેમાં એડવાન્સ રડાર સિસ્ટમ છે, સાથે જ એ એડવાન્સ હથિયારોથી સજ્જ હોય છે.

આ ફાઈટર જેટ હવાથી હવામાં મારવામાં સક્ષમ છે. એ એક મિનિટમાં લગભગ 50 હજાર ફૂટની ઊંચાઈ સુધી જઈ શકે છે. F-16 ચોથી જનરેશનનું લડાકુ વિમાન છે. એ ખરાબ હવામાનમાં પણ ઉડાન ભરી શકે છે.

ભારતને F-16 વેચવા માગે છે અમેરિકા

અમેરિકા વર્ષ 2000થી F-16 જેટ ભારતને વેચવાનો પ્રયાસ કરી રહ્યું છે, પરંતુ ભારતે એને ખરીદવાનો ઇનકાર કરી દીધો. આનું એક કારણ પાકિસ્તાનમાં એની હાજરી છે.

ખરેખર 1980ના દાયકાથી આ લડાકુ વિમાન પાકિસ્તાન પાસે છે. અમેરિકા અને પાકિસ્તાનની આ ડીલથી ભારત નારાજ છે, તેથી આજ સુધી ભારતે અમેરિકા પાસેથી F-16 ફાઈટર જેટ લીધું નથી.