દક્ષિણ ગુજરાતમાંથી ઝડપાયેલા 40 કરોડ રૂપિયાના ડ્રગ્સ કેસની તપાસ ગુજરાત ATSની ટીમ કરી રહી છે. ગુજરાત ATSની ટીમના ACP શંકર ચોધરીને બાતમી મળી હતી કે, આ કેસનો વોન્ટેડ આરોપી મોનુ ઓઝા હાલ રાજસ્થાન, જોધપુરના સોઈંત્રા ગામમાં છે. પોલીસે તેનું પાકું લોકેશન મેળવી તેને ઝડપી લેવા જુદી જુદી ટીમો રાજસ્થાન પહોંચી હતી. સોઈંત્રા ગામમાંથી પોલીસે મોનુને એક આખી ડ્રગ્સની ફેક્ટરી સાથે ઝડપી લીધો હતો. પોલીસે ડ્રગ્સ ફેક્ટરીમાંથી 40 કિલો લિક્વીડ એમડી ડ્રગ્સ પણ કબજે કર્યું હતું. સાથે મોનુના અન્ય પાંચ સાથીદારો ડુંગર સિંહ (ઉંમર 50), અલીમુદ્દીન (ઉંમર 58), ગોવિંદ સિંહ (ઉંમર 40), રણવિજય સિંહ (ઉંમર 50) તથા અઝીઝ ખાન (ઉંમર 48)ને પણ ઝડપી લીધા હતા.

 

 

હાલ આ કેસની તપાસ રાજસ્થાન પોલીસ કરી રહી છે. પ્રાથમિક તપાસમાં જાણવા મળ્યું છે કે, આ લોકો કેટલા સમયથી ફેક્ટરી ચલાવી રહ્યા છે, તેનો માસ્ટર માઇન્ડ કોણ છે, કોણે રોકાણ કર્યું છે, રો મટીરીયલ ક્યાંથી આવતું હતું અને તેઓ ડ્રગ્સ કોને સપ્લાય કરતા હતા. આ તમામ સવાલોના જવાબ મેળવવા કાર્યવાહી ચાલુ છે. જોકે, પ્રાથમિક તપાસમાં જ આ રેકેટ ગુજરાત અને રાજસ્થાન બે રાજ્યોમાં ચાલતું હોવાનું અને તેમાં ગુજરાતના મોટા માથાની સંડોવણી હોવાની વિગતો મળી રહી છે. આ ઉપરાંત ડ્રગ્સની ફેક્ટરી કેટલા સમયથી ધમધતી હતી અને કેટલું ડ્રગ્સ સપ્લાય કરી દેવામાં આવ્યું હતું તેની તપાસ પણ ચાલે છે.