ગોવાના અરપોરા સ્થિત ‘બિર્ચ બાય રોમિયો લેન’ નાઈટક્લબમાં 6 ડિસેમ્બરની રાત્રે ભીષણ આગ લાગી હતી. આ જ મામલે ગોવા પોલીસે મંગળવારે ક્લબ માલિક લુથરા બ્રધર્સના પાર્ટનર અજય ગુપ્તાને દિલ્હીથી કસ્ટડીમાં લીધા છે.

ગોવા પોલીસના જણાવ્યા અનુસાર, તપાસ દરમિયાન ગુપ્તા અને તેમના પાર્ટનર સુરિન્દર કુમાર ખોસલા વિરુદ્ધ અગાઉ લુક આઉટ સર્ક્યુલર (LOC) જારી કરવામાં આવ્યું હતું. પોલીસ ટીમ જ્યારે તેના દિલ્હી સ્થિત ઘરે પહોંચી ત્યારે તે ત્યાં મળ્યો ન હતો.

બાદમાં ગુપ્તાને દિલ્હીમાં શોધીને કસ્ટડીમાં લેવામાં આવ્યો હતો અને ટૂંક સમયમાં ગોવા લાવવામાં આવશે. જ્યારે ક્લબ માલિક સૌરભ અને ગૌરવ લુથરા હજુ પણ ફરાર છે. આગ લાગ્યાના થોડા કલાકો પછી તેઓ થાઈલેન્ડ ભાગી ગયા હતા અને તેમની વિરુદ્ધ ઇન્ટરપોલ બ્લુ કોર્નર નોટિસ જારી કરવામાં આવી છે.

આ આ કેસમાં છઠ્ઠી ધરપકડ છે. આ પહેલા પોલીસે ક્લબના મેનેજર રાજીવ મોદક, વિવેક સિંહ, રાજીવ સિંઘાનિયા, રિયાંશુ ઠાકુર અને કર્મચારી ભરત કોહલીની ધરપકડ કરી છે. 6 ડિસેમ્બરની રાત્રે નાઈટક્લબમાં લાગેલી આગમાં 25 લોકોના મોત થયા હતા અને ઘણા લોકો દાઝી ગયા હતા.

ગુપ્તા બ્રધર્સે ક્લબમાં પૈસા રોક્યા હતા

પોલીસ સૂત્રો અનુસાર, અજય ગુપ્તા ઉત્તર દિલ્હીનો રહેવાસી છે અને આ ક્લબમાં તેનો મોટો નાણાકીય હિસ્સો છે. તપાસમાં સામે આવ્યું છે કે અજય ગુપ્તા અને તેનો ભાઈ રાજેશ ગુપ્તા, બંને સૌરભ લુથરાના બિઝનેસ પાર્ટનર છે. ગુપ્તા બ્રધર્સે તે ક્લબમાં ઘણું રોકાણ કર્યું હતું, જે બળીને ખાખ થઈ ગયું. પોલીસ હવે અજય ગુપ્તાની પૂછપરછ કરી રહી છે જેથી ફરાર મુખ્ય આરોપીઓ સુધી પહોંચી શકાય.

બીજા ક્લબ પર બુલડોઝર ચલાવવામાં આવ્યું

મંગળવારે કાર્યવાહી કરતા, પ્રશાસને ચેઇનના બીજા ક્લબ પર બુલડોઝરની કાર્યવાહી કરી. ગોવાના CM પ્રમોદ સાવંતે વાગાટોરમાં સૌરભ અને ગૌરવ લુથરાના રોમિયો લેન બીચ શૅકને તોડી પાડવાનો આદેશ આપ્યો હતો.

ગોવા ટુરિઝમના ડેપ્યુટી ડાયરેક્ટરે કહ્યું કે અમે બીચ તરફથી અતિક્રમણ હટાવી દઈશું. તેમણે જણાવ્યું કે તોડી પાડવામાં આવનાર કુલ વિસ્તાર 198 સ્ક્વેર મીટર છે.

સરકારે ચાર સભ્યોની મેજિસ્ટ્રિયલ તપાસ સમિતિ બનાવી

ગોવા સરકારે સોમવારે આ દુર્ઘટનાની તપાસ માટે ચાર સભ્યોની મેજિસ્ટ્રિયલ તપાસ સમિતિ બનાવી છે. ગોવા સરકારે નાઇટક્લબ, રેસ્ટોરન્ટ, બાર અને ઇવેન્ટ વેન્યુ માટે નવી એડવાઇઝરી જાહેર કરી છે.

આ તરફ, જમીનના અસલી માલિક પ્રદીપ ઘાડી અમોનકરે ન્યૂઝ એજન્સી PTI ને જણાવ્યું કે ક્લબ મીઠાના ખેતરો પર ગેરકાયદેસર રીતે બનાવવામાં આવ્યો હતો. આ મામલો 20 વર્ષથી કોર્ટમાં ચાલી રહ્યો છે.