દાહોદના કસ્બા વિસ્તારમાં એક જ કોમના બે જૂથ વચ્ચે અથડામણ થઈ હતી. જૂની અદાવતને લઈને પહેલા બોલાચાલી થઈ બાદમાં મામલો હિંસક બન્યો હતો. ઝગડાએ ઉગ્ર સ્વરૂપ ધારણ કરતાં સામે પક્ષે અંધાધૂંધ 5 રાઉન્ડ ફાયરિંગ કરાયું હતું.

પોલીસનો કાફલો સ્થળ પર હાજર

આ ફાયરિંગની ઘટનામાં બે વ્યક્તિઓને ગોળી વાગતા ગંભીર રીતે ઈજાઓ પહોંચી છે. ઘટનાની જાણ થતા DYSP સહિત LCB, SOG અને ડિવિઝન પોલીસનો કાફલો સ્થળ પર પહોંચ્યો છે.

પોલીસે વિસ્તારને કોર્ડન કરી તપાસ શરૂ કરી

બંને ઈજાગ્રસ્તોને તાત્કાલિક સારવાર માટે હોસ્પિટલ ખસેડવામાં આવ્યાં છે. પોલીસે વિસ્તારને કોર્ડન કરી સમગ્ર મામલે તપાસ શરૂ કરી છે.

દાહોદના DYSP જગદીશ ભંડારીએ જણાવ્યું કે, જૂની અદાવતના કારણે બે પક્ષો વચ્ચે મારામારીમાં ફાયરિંગનો બનાવ બન્યો છે. ફાયરિંગ કરનારાઓ સામે પોલીસ કાર્યવાહી કરશે. આ ઘટનામાં પ્રાથમિક તપાસમાં બે લોકોને ઈજા પહોંચી હોવાનું સામે આવ્યું છે. જેઓને હાલ હોસ્પિટલમાં લઈ જવામાં આવ્યાં છે. જ્યાં પણ પોલીસની ટીમને મોકલવામાં આવી છે.