લિબિયાઈ સેનાના ચીફ ઓફ જનરલ સ્ટાફ લેફ્ટનન્ટ જનરલ મોહમ્મદ અલ-હદ્દાદનું મંગળવારે રાત્રે તુર્કીમાં પ્લેન ક્રેશમાં મૃત્યુ થયું. પ્લેનમાં 8 લોકો સવાર હતા, બધાનું ઘટનાસ્થળે જ મૃત્યુ થયું.

તુર્કીના ગૃહમંત્રી અલી યેરલિકાયાએ જણાવ્યું કે ફાલ્કન-50 વિમાનનો કાટમાળ અંકારા નજીક હાયમાના વિસ્તારમાં મળ્યો છે. લિબિયાઈ અધિકારીઓ અનુસાર, વિમાનમાં ટેકઓફના 30 મિનિટ પછી જ ટેકનિકલ ખામી આવી ગઈ હતી, જેના કારણે આ દુર્ઘટના થઈ.

આ લિબિયાઈ મિલિટરી ડેલિગેશન અંકારામાંતુર્કી સાથે સંરક્ષણ સહયોગ વધારવા અંગે ઉચ્ચ સ્તરીય વાતચીત માટે આવ્યું હતું અને પાછું લિબિયા પરત ફરી રહ્યું હતું.

દુર્ઘટનામાં મૃત્યુ પામેલા લોકોમાં લિબિયાના થલ સેના પ્રમુખ જનરલ અલ-ફિતૂરી ઘ્રૈબિલ, બ્રિગેડિયર જનરલ મહમૂદ અલ-કતાવી, ચીફ ઓફ સ્ટાફના સલાહકાર મોહમ્મદ અલ-અસાવી દિયાબ, સૈન્ય ફોટોગ્રાફર મોહમ્મદ ઓમર અહમદ મહજૂબ અને 3 ક્રૂ મેમ્બર શામેલ છે.

પ્લેને ઇમરજન્સી લેન્ડિંગનો મેસેજ મોકલ્યો હતો

લિબિયાના વડાપ્રધાન અબ્દુલ-હામિદ દબૈબાએ ફેસબુક પર નિવેદન જારી કરીને જનરલ અલ-હદ્દાદ અને અન્ય અધિકારીઓના મૃત્યુની પુષ્ટિ કરી અને તેને દેશ માટે ખૂબ મોટું નુકસાન ગણાવ્યું.

તુર્કીના ગૃહમંત્રી અલી યરલીકાયાના જણાવ્યા અનુસાર, વિમાન સ્થાનિક સમય મુજબ રાત્રે લગભગ 8 વાગ્યે અંકારાના એસનબોગા એરપોર્ટ પરથી ઉડાન ભરી હતી અને થોડા સમય પછી સંપર્ક તૂટી ગયો હતો.

પ્લેને હાયમાના વિસ્તાર નજીક ઇમરજન્સી લેન્ડિંગનો સંકેત મોકલ્યો હતો, પરંતુ તે પછી કોઈ સંપર્ક થઈ શક્યો ન હતો.