બાંગ્લાદેશના પ્રથમ મહિલા વડાપ્રધાન અને બાંગ્લાદેશ નેશનાલિસ્ટ પાર્ટી (BNP)ના પ્રમુખ ખાલિદા ઝિયાનું આજે સવારે 6 વાગ્યે 80 વર્ષની વયે નિધન થયું. તેઓ 20 દિવસથી વેન્ટિલેટર પર હતાં.

ખાલિદા છેલ્લા ઘણા વર્ષોથી છાતીમાં ઇન્ફેક્શન, લિવર, કિડની, ડાયાબિટીસ, સંધિવા અને આંખોની સમસ્યાથી પીડાઈ રહ્યા હતા. તેમના પરિવાર અને પાર્ટીના નેતાઓએ નિધનની પુષ્ટિ કરી છે.

ખાલિદા 1991 થી 1996 અને 2001 થી 2006 સુધી બે વાર બાંગ્લાદેશના વડાપ્રધાન રહ્યા હતા. તેઓ પૂર્વ રાષ્ટ્રપતિ ઝિયાઉર રહેમાનના પત્ની હતા.

તેમના મોટા પુત્ર અને BNPના કાર્યકારી અધ્યક્ષ તારિક રહેમાન 2008 થી લંડનમાં રહી રહ્યા હતા. તેઓ 25 ડિસેમ્બરે બાંગ્લાદેશ પાછા ફર્યા છે. જ્યારે, તેમના નાના પુત્ર અરાફાત રહેમાનનું 2015માં હૃદયરોગના હુમલાથી નિધન થયું હતું.

સોમવારે ચૂંટણીનું નામાંકન દાખલ કર્યું હતું

ખાલિદા ઝિયાએ સોમવારે (29 ડિસેમ્બર) જ ચૂંટણીનું નામાંકન દાખલ કર્યું હતું. બપોરે લગભગ ત્રણ વાગ્યે પાર્ટીના વરિષ્ઠ નેતાઓ બોગુરા-7 બેઠક પરથી તેમનું નામાંકન પત્ર જમા કરાવવા ડેપ્યુટી કમિશનર અને રિટર્નિંગ ઓફિસરની ઓફિસે પહોંચ્યા હતા.

તે સમયે સ્પષ્ટ થઈ ગયું હતું કે ખાલિદા ઝિયાની તબિયત અત્યંત નાજુક છે. તેઓ વેન્ટિલેટર પર હતા. તેમ છતાં BNPએ નિર્ણય કર્યો કે ખાલિદા ચૂંટણી લડશે.

બોગુરા-7 બેઠકનું BNP માટે ખાસ મહત્વ છે. આ જ વિસ્તારમાં પાર્ટીના સ્થાપક અને ખાલેદા ઝિયાના પતિ ઝિયાઉર રહેમાનનું ઘર રહ્યું છે. ખાલેદાએ ત્રણ વખત 1991, 1996 અને 2001માં આ જ બેઠક પરથી ચૂંટણી જીતી હતી.

ખાલિદા ઝિયા અનેક બીમારીઓ સામે ઝઝૂમી રહ્યા હતા

ખાલિદા ઝિયા ઘણા સમયથી બીમાર હતા, તેઓ ફક્ત એક જ નહીં પરંતુ અનેક ગંભીર બીમારીઓથી પીડાતા હતા. તેમને હૃદયરોગ હતો અને વારંવાર હાઈ બ્લડ પ્રેશરની સમસ્યા રહેતી હતી. તેણીને ડાયાબિટીસ પણ હતી. તેમને લીવર અને કિડનીની પણ સમસ્યા હતી.

તેણીને સંધિવાની બીમારી હતી, જેના કારણે ચાલવામાં મુશ્કેલી પડતી હતી. તેમને વારંવાર ઈન્ફેક્શન થતું હતું, ખાસ કરીને ફેફસામાં. તેમના અંતિમ દિવસોમાં, તેમને શ્વાસ લેવામાં તકલીફ વધી ગઈ અને તેમનું સ્વાસ્થ્ય બગડ્યું. તેઓ લાંબા સમયથી આ બીમારીઓની સારવાર લઈ રહ્યા હતા.

ખાલિદાનો જન્મ ભારતના જલપાઇગુડીમાં થયો હતો

ખાલિદા ઝિયાના પરિવારમાં તેમના મોટા પુત્ર, તારિક રહેમાન, બે પુત્રવધૂ અને ત્રણ પૌત્ર-પૌત્રીઓ છે. તેમના નાના પુત્ર, અરાફત રહેમાન કોકોનું 2015માં મલેશિયામાં નિધન થયું હતું.

ખાલિદા ઝિયાનો જન્મ 1945માં જલપાઈગુડીમાં થયો હતો. તેમણે શરૂઆતનો અભ્યાસ દિનાજપુર મિશનરી સ્કૂલમાં કર્યો હતો અને 1960માં દિનાજપુર ગર્લ્સ સ્કૂલમાંથી મેટ્રિક પાસ કર્યું હતું.

તેમના પિતા, ઇસ્કંદર મઝુમદાર, એક બિઝનેસમેન હતા અને તેમની માતા, તૈયબા મઝુમદાર, એક ગૃહિણી હતી. તેઓ પરિવારમાં બીજા નંબરના સંતાન હતા અને ઘરમાં તેમને પ્રેમથી "પુતુલ" કહેવામાં આવતા હતા.

ખાલિદા 1984માં BNPના ઉપપ્રમુખ બન્યા અને બાદમાં પાર્ટી પ્રમુખ તરીકે ચૂંટાયા. તેમના નેતૃત્વ હેઠળ, બીએનપીએ તાનાશાહી શાસન સામે આંદોલનનું નેતૃત્વ કર્યું.