સુરતમાં BMW-મહિન્દ્રાની 150+ સ્પીડથી રેસના CCTV:મંથન પટેલે દારૂ પીને રેસ લગાવી, 3 કાર ને 3 વીજપોલનો કચ્ચરઘાણ
નવા વર્ષની ઉજવણીના ઉત્સાહ વચ્ચે સુરતના પોશ ગણાતા વેસુ વીઆઈપી રોડ પર નબીરાઓની જોખમી રેસિંગે નિર્દોષ લોકોના જીવ જોખમમાં મૂક્યા હતા. મોંઘીદાટ લક્ઝરી કારો લઈને નીકળેલા બે નબીરાએ પૂરપાટ ઝડપે રેસ લગાવતાં એક ભયાનક અકસ્માત સર્જ્યો હતો.
આ અકસ્માત એટલો જોરદાર હતો કે એમાં સામેલ ત્રણેય કારોનો કચ્ચરઘાણ નીકળી ગયો હતો અને મ્યુનિસિપલ કોર્પોરેશનના ત્રણ જેટલા લાઈટ પોલ જડમૂળથી ઊખડી ગયા હતા. વેસુ પોલીસે આ મામલે એક કાપડ વેપારી નબીરાની ધરપકડ કરી છે, જ્યારે અન્ય એક ચાલક ફરાર થઈ ગયો છે.
1 જાન્યુઆરી, 2026ની રાત્રે દારૂ પીને 150 કિમીથી વધુની ઝડપે મહિન્દ્રાની ઇલેક્ટ્રિક BE-6 કાર હંકારી રહેલા કાપડ વેપારી મંથન પટેલ અને BMW ચલાવી રહેલા ઝલક નામના યુવાને નિર્દોષ પરિવારની સ્વિફ્ટ કારનો કચ્ચરઘાણ કાઢી નાખ્યો હતો. આ રેસિંગ દરમિયાન BMW કારમાં ઝલકની બાજુમાં ઋષિ નામનો યુવક પણ સવાર હતો.
પૂરપાટ ઝડપે આવતી કારોએ એશા જૈન નામની મહિલા ચાલકની ગાડીને પાછળથી જોરદાર ટક્કર મારતાં એશાબેનને પીઠના ભાગે ગંભીર ઈજાઓ પહોંચી હતી અને તેઓ હાલ હોસ્પિટલમાં સારવાર હેઠળ છે. આરોપી મંથન દારૂના નશામાં હતો તેથી તેની ઉપર વેસુ પોલીસે કેસ કર્યો છે. કાર રેસિંગના અને અકસ્માત બાદ ભાગતા વેપારી મંથન પટેલના CCTV પણ સામે આવ્યા છે.
150 કિમીની સ્પીડે ડેડલી રેસ મળતી માહિતી મુજબ, ન્યૂ યરની રાત્રે બે નબીરાઓ પોતાની લક્ઝરી કાર્સ- મહિન્દ્રા BE-6 (ઈલેક્ટ્રિક) અને BMW લઈને રસ્તા પર રેસિંગ કરી રહ્યા હતા. વેસુ પોલીસની પ્રાથમિક તપાસમાં બહાર આવ્યું છે કે અકસ્માત સમયે બંને કારોની સ્પીડ 150 કિલોમીટર પ્રતિ કલાકથી પણ વધુ હતી. આ બેફામ ગતિએ દોડતી કારોએ રસ્તા પરથી પસાર થઈ રહેલી સ્વીફ્ટ કારને જોરદાર ટક્કર મારી હતી.
કારના ફૂરચેફૂરચા અકસ્માતની તીવ્રતા એટલી વધારે હતી કે જોતા જ હૃદય ધ્રૂજી ઉઠે. ટક્કર લાગતાની સાથે જ સ્વીફ્ટ કાર ચલાવી રહેલી મહિલાને ગંભીર ઇજાઓ પહોંચી હતી. કારને આગળથી લઈ પાછળ સુધી મોટું નુકસાન થયું હતું અને કાચના ટુકડા રસ્તા પર વેરવિખેર થઈ ગયા હતા.
3 વીજપોલ જમીનદોસ્ત BMW કારમાં એરબેગ સમયસર ખુલી જતાં તેના ચાલકનો બચાવ થયો હતો, પરંતુ લક્ઝરી કારોના આગળના ભાગનો કચ્ચરઘાણ નીકળી ગયો હતો.પુરપાટ ઝડપે જતી કારો રસ્તાની બાજુમાં આવેલા ડિવાઈડર અને લાઈટ પોલ સાથે અથડાઈ હતી, જેના કારણે મનપાના ત્રણ પોલ ઉખડીને જમીનદોસ્ત થઈ ગયા હતા.
કાપડ વેપારીની ધરપકડ સમગ્ર મામલે વેસુ પોલીસે કડક કાર્યવાહી હાથ ધરી છે. અકસ્માત સર્જનાર મહિન્દ્રા BE-6 કારના ચાલક મંથન પટેલ નામના યુવકની ધરપકડ કરવામાં આવી છે. પોલીસના જણાવ્યા અનુસાર, મંથન પટેલ કાપડના વ્યવસાય સાથે સંકળાયેલો નબીરો છે. જ્યારે તેની સાથે રેસ લગાવી રહેલો અન્ય કારનો ચાલક અકસ્માત બાદ સ્થળ પરથી ફરાર થઈ ગયો છે, જેની શોધખોળ અત્યારે તેજ કરવામાં આવી છે.
મહિલા પતિ-બાળક સાથે કારમાં જતી હતી અકસ્માતનો ભોગ બનેલી મહિલાની ઓળખ 25 વર્ષીય એશાબેન રીતેશભાઇ જૈન (રહે. પર્વત પાટીયા) તરીકે થઈ છે. એશાબેન તેમના પતિ રીતેશભાઇ અને બાળકો સાથે કારમાં સવાર થઈને વી.આઈ.પી. રોડથી ઘરે જઈ રહ્યા હતા, ત્યારે અજાણ્યા કાર ચાલકે પાછળથી પૂરપાટ ઝડપે આવી તેમની ગાડીને ઉડાવી હતી. ઇજાગ્રસ્ત મહિલાને તાત્કાલિક નવી સિવિલ હોસ્પિટલ ખસેડવામાં આવ્યા હતા, જ્યાં પ્રાથમિક સારવાર બાદ વધુ સારવાર માટે ઉધના દરવાજા ખાતેની એપલ હોસ્પિટલમાં ખસેડવામાં આવ્યા છે. ડોક્ટરોના જણાવ્યા મુજબ, મહિલા હાલ ભાનમાં છે પરંતુ તેમને પીઠના ભાગે ગંભીર ઈજા હોવાથી ચોથા માળે સેમી સ્પેશિયલ રૂમમાં દાખલ કરી સારવાર આપવામાં આવી રહી છે.
અન્ય કારમાં સવાર બે આરોપીઓ ત્યાંથી ભાગી છૂટ્યા હતા જ્યાં અકસ્માતની આ ઘટના બની, તેની નજીક જ ફાયર સ્ટેશન આવેલું છે. ધડાકાભેર અવાજ આવતા જ ડ્યુટી પર હાજર ફાયર બ્રિગેડના કેટલાક જવાનો તાત્કાલિક ઘટનાસ્થળે પહોંચી ગયા હતા. તેઓએ કારમાં ફસાયેલા મહિલા, તેમના પતિ અને નાના બાળકને સુરક્ષિત રીતે બહાર કાઢ્યા હતા. આ દરમિયાન, અન્ય બે કારમાં સવાર આરોપીઓ ત્યાંથી ભાગી છૂટ્યા હતા. ફાયરના જવાનોએ દોઢ મહિનાના માસૂમ બાળકને પણ હેમખેમ બચાવી લીધું હતું.
અકસ્માત સમયે ઝલક જ BMW કાર ચલાવી રહ્યો હતો સ્થાનિક લોકોના જણાવ્યા અનુસાર, કારમાં એક વિદેશી વ્યક્તિ પણ સવાર હતો. આ વિદેશી વ્યક્તિ કોણ છે, તે અંગે પોલીસ હાલ તપાસ કરી રહી છે. મંથન પટેલ કાપડના વ્યવસાય સાથે સંકળાયેલો છે, જ્યારે હાલ ફરાર આરોપી ઝલક આહિર કન્સ્ટ્રક્શનના વ્યવસાય સાથે જોડાયેલો છે. અકસ્માત સમયે ઝલક જ BMW કાર ચલાવી રહ્યો હતો અને તેની સાથે ઋષિ નામનો અન્ય એક યુવક પણ હાજર હતો.
