અમદાવાદના સી.જી રોડ પર ગત મોડી(4 જાન્યુઆરી) રાતે એક સ્પોર્ટ્સ બાઈક ચાલકે પૂર ઝડપે આવીને રોડ ક્રોસ કરી રહેલા યુવકને અડફેટે લીધો હતો. બાઇક ચાલક અને રોડ ક્રોસ કરી રહેલા યુવક બંનેને ઇજા થઈ હતી. પરંતુ રોડ ક્રોસ કરી રહેલા યુવકનું ગંભીર ઇજાના કારણે સ્થળ પર જ મોત થયું હતું. બાઇક ચાલકને સારવાર માટે હોસ્પિટલ ખસેડવામાં આવ્યો છે.

સ્પોર્ટ્સ બાઈક ચાલક પૂર ઝડપે આવીને ટક્કર મારી

મળતી માહિતી અનુસાર, સી.જી રોડ પર ભાડાના મકાનમાં રહેતો 25 વર્ષીય પ્રકાશ ડિંડોર તેની સોસાયટીમાં રહેતા મિત્ર મહેન્દ્ર ચૌહાણ સાથે ચાલવા ગયા હતા. બંને મિત્રો ચાલીને મરડિયા પ્લાઝા પાસેથી રોડ ક્રોસ કરી રહ્યા હતા, ત્યારે એક સ્પોર્ટ્સ બાઈક ચાલક પૂર ઝડપે આવ્યો હતો જેને પ્રકાશને ટક્કર મારી હતી. ટક્કર એટલી જોરદાર હતી કે પ્રકાશને ગંભીર ઇજા થતા ઘટનાસ્થળે જ મોત થયું હતું. જ્યારે બાઇક ચાલક ઇજાગ્રસ્ત થયો હતો.

યુવકના મૃતદેહને પોસ્ટમોર્ટમ માટે ખસેડાયો

અકસ્માતમાં પ્રકાશને પૂરઝડપે ટક્કર વાગતા પ્રકાશના પગ પર બાઇક પર હતા. અકસ્માત કરનાર સુફિયાન મુસ્તુફા ગોતાના PGમાં રહે છે. સુફિયાનને સારવાર માટે હોસ્પિટલ ખસેડવામાં આવ્યો છે જ્યારે પ્રકાશના મૃતદેહને પોસ્ટમોર્ટમ માટે મોકલવામાં આવ્યો છે. બી ડિવિઝન ટ્રાફિક પોલીસે સુફિયાન મુસ્તુફા વિરુદ્ધ ગુનો નોંધી તપાસ શરૂ કરી છે.

કારચાલકે બે બાઈક પર ગાડી ચડાવતા એકનું મોત, CCTV

અમદાવાદ શહેરમાં ગુજરાત કોલેજ ત્રણ રસ્તા પાસે હિટ એન્ડ રનમાં બેફામ કારચાલકે 2 બાઇકચાલકને અડફેટે લીધા હતાં. રસ્તા પર પૂરપાટ ઝડપે વાહન હંકાવી અજાણ્યા કાર ચાલકે બાઇકને જોરદાર ટક્કર કરી હતી. અક્સ્માત એટલો ગંભીર હતો કે એક બાઇક ચાલક ચંદ્રકાંત પંચાલ રોડ પર ગંભીર રીતે ઘસડાયો હતો. જેથી અકસ્માતમાં ગંભીર રીતે ઈજાગ્રસ્ત થવાથી ચંદ્રકાંત પંચાલનું મોત નીપજ્યું છે.

અમદાવાદના અનુપમ બ્રિજ પર AMTS બસ ચાલકે એક્ટિવાને ટક્કર મારી

અમદાવાદ શહેરમાં અકસ્માતની ઘટના દિવસે અને દિવસે વધી રહી છે. ત્યારે અનુપમ બ્રિજ પર અકસ્માત થતા એક બાળકે જીવ ગુમાવ્યો છે. અનુપમ બ્રિજ પર બેફામ AMTS બસ અને એક્ટિવા વચ્ચે અકસ્માત થયો હતો. એક્ટિવા લઈને જતી મહિલા પાછળ 12 વર્ષનો બાળક પણ હતો. જે ગંભીર ઈજા થતાં મોત થયું.

જીવ અધ્ધર કરી દેતો અકસ્માતનો VIDEO

અમદાવાદ શહેરમાં ચાલુ વાહને મોબાઈલનો ઉપયોગ કરવો એક યુવક માટે ભારે પડી ગયો. શહેરના ઓવરબ્રિજ પરથી પસાર થતી સમયે મોબાઈલનો ઉપયોગ કરી રહેલા મોપેડચાલકે કાબૂ ગુમાવતાં બ્રિજ પર ઊંધેકાંધ પટકાયો હતો. સદનસીબે પાછળથી આવી રહેલા કારચાલકે બ્રેક મારી દેતાં યુવકનો જીવ બચી ગયો હતો.