ઉત્તર પ્રદેશમાં બુધવારે કડકડતી ઠંડીની અસર છે. રાજ્યના 19 શહેરોનું લઘુત્તમ તાપમાન સિમલા (6.6°C) કરતાં ઓછું રહ્યું. સૌથી ઓછું તાપમાન 2.1°C મુઝફ્ફરનગરનું નોંધાયું. મેરઠ-સંભલ સહિત 25 જિલ્લાઓમાં ગાઢ ધુમ્મસ છવાયું છે. બિજનૌરમાં બસ પલટી જતાં 38 મુસાફરો ઘાયલ થયા છે.

હરિયાણામાં આજે સીવિયર કોલ્ડવેવનું ઓરેન્જ એલર્ટ છે. 14 જિલ્લાઓમાં કડકડતી ઠંડીનું ઓરેન્જ એલર્ટ છે. બાકીના જિલ્લાઓમાં ગાઢ ધુમ્મસ અને કોલ્ડ ડેની સ્થિતિ રહેશે. છેલ્લા 24 કલાકમાં હરિયાણાનું મહત્તમ તાપમાન 3.8°C ઘટ્યું છે. કરનાલમાં તાપમાન 10.0°C રહ્યું.

રાજસ્થાનના 5 જિલ્લાઓમાં ઠંડીનું યલો એલર્ટ છે. હવામાન વિભાગ મુજબ શુક્રવારથી રાજ્યનું હવામાન સ્વચ્છ રહેશે. કોલ્ડવેવથી પણ રાહત મળશે. મંગળવારે રાજ્યમાં મહત્તમ તાપમાન 27.0°C પહોંચ્યું. ગંગાનગર, હનુમાનગઢ સિવાયના બાકીના જિલ્લાઓમાં મહત્તમ તાપમાન 20°C-27°C ની વચ્ચે રહ્યું.

અહીં બિહારના 18 જિલ્લામાં લઘુત્તમ તાપમાન 10°Cથી નીચે રહ્યું. સૌથી ઓછું ભાગલપુરના સબૌરમાં 5.9°C નોંધાયું. પટનામાં ધોરણ 1 થી 12 સુધીના વર્ગો સવારે 9 વાગ્યાથી ચાલશે. ઉત્તરાખંડમાં પિથોરાગઢ, ચમોલી, ઉત્તરકાશી અને રુદ્રપ્રયાગમાં ઝરણાં થીજી ગયાં છે. તાપમાન પણ માઈનસ 16 °C છે.

આગામી 2 દિવસ હવામાનની સ્થિતિ...

15 જાન્યુઆરી: પહાડી રાજ્યોમાં ભારે હિમવર્ષા

જમ્મુ-કાશ્મીર, હિમાચલ પ્રદેશમાં વરસાદનું એલર્ટ, પહાડી વિસ્તારોમાં ભારે હિમવર્ષા થઈ શકે છે.

પંજાબ, હરિયાણા, રાજસ્થાન, બિહાર, ઉત્તર પ્રદેશમાં ગાઢ ધુમ્મસનું એલર્ટ, કડકડતી ઠંડી પડી શકે છે.

16 જાન્યુઆરી: હિમાચલમાં વરસાદ-હિમવર્ષાનું એલર્ટ

હિમાચલ પ્રદેશમાં 16 થી 18 જાન્યુઆરી દરમિયાન કેટલીક જગ્યાએ હળવો વરસાદ અથવા હિમવર્ષા થઈ શકે છે.