ઉત્તર ભારતમાં વેસ્ટર્ન ડિસ્ટર્બન્સ એક્ટિવ થવાથી હવામાન બદલાઈ ગયું છે. રાજસ્થાન, ઉત્તર પ્રદેશ અને દિલ્હીમાં મોડી રાતથી વરસાદ પડી રહ્યો છે. ભારે પવનો ફૂંકાઈ રહ્યા છે. આનાથી ઘણા જિલ્લાઓમાં તાપમાન ઘટ્યું છે.

હિમાલયના રાજ્યોમાં પણ વરસાદ-બરફવર્ષાનો વધુ એક રાઉન્ડ શરૂ થઈ ગયો છે. હિમાચલના સિમલા-મનાલીમાં સિઝનની પ્રથમ બરફવર્ષા થઈ. આનાથી સાડા ત્રણ મહિનાથી ચાલી રહેલો ડ્રાય સ્પેલ (સૂકો સમયગાળો) સમાપ્ત થઈ ગયો છે.

ઉત્તરાખંડના ઊંચાઈવાળા વિસ્તારોમાં પણ તાપમાનમાં ઘટાડો ચાલુ છે. પિથોરાગઢના આદિકૈલાશ અને કેદારનાથ ધામમાં લઘુત્તમ તાપમાન -18°C રહ્યું.

જમ્મુ-કાશ્મીરના ગુલમર્ગમાં બરફવર્ષાનો દોર ચાલુ છે. જ્યારે, શુક્રવારે શ્રીનગરમાં બરફવર્ષાના કારણે, ટેક-ઓફ અને લેન્ડિંગ સહિતની ફ્લાઇટ કામગીરીને અસ્થાયી રૂપે રોકી દેવામાં આવી છે.

હાલમાં બરફવર્ષાના કારણે શ્રીનગર-જમ્મુ હાઈવે બંધ કરી દેવામાં આવ્યો છે. નવયુગ ટનલ પાસે ટ્રાફિક રોકી દેવામાં આવ્યો છે. મુગલ, સિન્થન અને SSG રસ્તાઓ પણ બંધ છે.

હવામાન વિભાગના જણાવ્યા અનુસાર, 26 જાન્યુઆરીના રોજ બીજું મજબૂત વેસ્ટર્ન ડિસ્ટર્બન્સ એક્ટિવ થશે. જેના કારણે ઉત્તર ભારતના 9 રાજ્યોમાં વરસાદ અને પહાડી રાજ્યોમાં હિમવર્ષા થઈ શકે છે.